Şirnex de Hmsereka Pêroyî ya Partîya Herêmanê Demokratîkan (DBP) Çîgdeme Kiliçgun Uçar, Wekîlê Partya Demokrasîyî û Têdûştîye ya Şaran (DEM Partî)  Salîha Aydenîz û Zekî Îrmez  û seyan kesî seba ke vera weçînayîşê merkezê Şirnexî û  Qilebanî îtîraz bikerê ver bi edlîye rayra şîyî.

Polîsan Meydanê Omer Kabakî de verê şarî girewt. Şarî peyser game nêeşte û naye ser o polîsan hêriş kerd. Polîsan bi gazê îsotî û mermîyanê plastîkan hêriş kerd û bi desan kesî destbend kerdî. Wextê hêrişê polîsan de kapsulê gazî îsabetê sereyê şêwirmendê Çîgdeme Kiliçgun Uçar, Erkan Tepeli kerd. Namzedê Şaredarîya Şirnexî yê DEM Partî Turan Saltan zî raştê hêrişî ame birnika ci ra gonî ameye.

Şar dima ra verê banê DEM Partî de ame têhet û tîya eşkerayîye ameye dayene. Hemsereka Pêroyî ya DBPyî Çîgdeme Kiliçgun Uçara ke eşkerayîye de qisey kerd nê vatî: ''Şarî nê weçînayîşî de cewabo tewr rind da polîtîkaya tecrîd, dişmenîya vera kurdan û bêçareserîye ya îqtîdarî. Tewr zaf ma kurdî zanê ke nê îqtîdarî 22 serrî  se kerd. Nê îqtîdarî teberê dizdîye, xesp, zirar, tepiştiş, destbendkerdiş û mergî çîyêk nêard.

Hemşaredarê Şirnexî  Turan Saltan o. Namzedê AKPyî ke sey serekî ardo tîya dizd o. 8 hezar leşkerî ardî tîya bi sextekarîye reyî girewtî. Îqtîdarê AKPyî qedîyayo. Keno ke morê xo bido binê serkewtişanê sexteyan ro. Ma do destûr medê. Heme şirnakijanê ke tîya raye daya do Wezîrîya Pawitişê Mîllî û Heyetê Weçînayîşî yê Berzî rê waştişname bişawê. Îradeyê şarê Şirnexî do bêro naskerdene.''

Badê eşkerayîye verê banê partî de çalakîya roniştişî ameye destpêkerdene.