Dewleta tirke ya îşxalkere bi mengan o herra Başûrê Kurdîstanî de vera gerîlayanê azadîye yê Kurdîstanî çekanê kîmyewîyan şuxulnena.

Merkezê Îrtîbatî  û Çapemenîye yê HPGyî yaroje bi eşkerayîya hîraye da zanayene ke xeylêk gerîlayî netîceya şuxulnayîşê çekanê kîmyewîyan ê ke hetê dezgehanê mîyanneteweyî ra ameyî qedexekerdene, ra ameyî şehîdkerdene.

Partîyanê muxalîfan ê Almanya ra Partîya Çepe babeta şuxulnayîşê çekanê kîmyewîyan ê dewleta tirke kirişte rojdemê Meclîsê Federelî.

Serkêşîya Wekîla Partîya Çepe Gokaye Akbulut de dosyaya ke ameye amedekerdene teqdîmê Meclîsê Federelî yê Almanya bîyî û hukmatî ra ame persayene ke ê pê hayîdar ê dewleta tirke operasyonan de vera gerîlayan çekanê kîmyewîyan şuxulnena ya nê. Yeno pawitene ke Hukmato Federel hewteyê verê ma de do cewabê nê persan bido.

Akbuluta ke ANFyî derheqê babete de qisey ard ziwan ke dîmenê ke ameyî parekerdene de yeno vînayene ke dewleta tirke çekanê kîmyewîyan şuxulnena û vat ganî pîsporî cigêrayîş bidê destpêkerdene. Akbulute bale ante rolê Almanya ser û vat: ''Seba ke tekîlîya Almanya bi Tirkîya esta a zî berpirsîyar a. Ganî Almanya hinî bêveng memano û cade vera naye çîyêk bikero. Almanya eşkena Rêxistina Qedexekerdişê Çekan ê Kîmyewîyan (OPCW) bifîno dewre.''