Qezaya Silopî ya Şirnexî de wextê qedexeyê tebervejîyayîşî yê 2015î de Dayîke Taybete Înan roja 5. ya qedexeyî de tornê xo Yusuf Înanî reyde amebî kiştene û cenazaya ci 7 rojan kuçe de amebî verdayene.

Serrgêra 6. ya qirkerdişê dayîke Taybete de Rêxistina HDPyî ya Silopî a cayê qirkerdişê ci de yad kerde. Welîka HDPyî ya Şirnexî Nurane Îmîr, îdarekar û endamê HDPyî, Mayê Haştîye, Aktîvîstê Têgêrayîşê Cinîyan ê Azadan (TJA) û xeylêk kesî tewrê merasîmê yadkerdişî bîyî.

Hemsereka HDPyî ya Silopî Asumane Kulter merasîm de qisey kerd û ard ziwan ke heta ke faîlî bêrê cezakerdene ê do têkoşînê xo rê dewam bikerê.

Dima Wekîla HDPyî ya Şirnexî Nurane Îmîr qisey kerd û vat: ''Dayîke Taybete rûmeta pêro kurdan a. Kiştoxê aye dişmenê şarê kurdî yê. 7 rojî û 7 şewî bedenê dayîke Taybete mend.  A roje ra heta nika ma hê tarîtîye de yê. Qirkerdişê dayîke Taybete mojneno ke seba kişîyayîşê aye kurdayetîya ci bes bîye. Rixmo ke qirkerdişê aye ra ser 6 serrî vîyartî ma a xo vîr a nêkerde û do xo vîr a nêkerê.''

Keyeyê Înanî ser o kênaya Taybete Înan Halîme Înan  qisey kerd û vat: ''Dadîya mi serewedarnayox bîye. Dadîya mi qetî do vîran ra nêşora. Estbîyayîşê dayîka mi her çi bi. Dadîya mi dadîya pêro Kurdîstanî ya. '' 

Qiseykerdişan ra dima qeranfîlî ronîyayî cayê serebûtî. 

Dima heyetê HDPyî şi keyeyê Mela Hesan Saniro ke wextê qedexeyî de serê nimajî de kişîyabi.