Rayberê Şarê Kurdî Abdullah Ocalan 22 serrrî yo binê tecrîdê giranî de yo. Zîndanan de vera tecrîdî û binpaykerdişê heqanê tepişteyan 27ê teşrîna peyêne de grevê vêşanîyo ke dest pêkerd roja 100. de yo. Reyna Kampa Mexmûrî û Kampa Lavrio yê Yunanistan de grevê vêşanîye bi mengano dewam kenê.

Hemsereka Pêroyî ya Partîya Demokratîke ya Şaran (HDP) Pervine Buldan, Hemserekê Komeleya Heqanê Merdiman (ÎHD) Ozturk Turkdogan û  Hemvervatoxê Komîsyonê Zîndanan ê Komeleya Huqûqnasanê Seba Azadîye (OHD) yê Herêma Marmara Bariş Marhanî tecrîdê Îmraliyî û xoverdayîşê zîndanan ANFyî rê ercnayî.

Buldane: Tecrîd Îmraliyî ra heme komelî rê vila beno

Pervîne Buldan vat: ''Îqtîdar polîtîkaya tecrîdî ke Îmrali de ano ca  pê hîrakerdişê cehd keno ke heme komelî ser o bîyaro caardene. Tecrîd mekanîzmaya rayraberdişê sîyasetê bêçareyî û rejîmê bêhuqûqîye yo. Pê tecrîd dest pê bêedalETîye, bêhuqûqîye, xespkerdişê qeyûmî û îşkec, dizdîye û heme binpaykerdişanê heqanê bînan kerd. Nika no pede-pede vila beno. Îqtîdar rixmê raporê CPTyî bêhuqûqîye xo rê dewam keno. Qeraranê Mehkemeya Heqanê Merdiman a Ewropa nêano ca.

Zîndanan da anorê merdimîye yeno binpaykerdene cigêrayîşê rût yeno kerdene, tepişteyê ke wextê tehlîyeya înan yena bi sebebê cezayanê dîsîplînî nînê verdayene. Zereyê zîndanî de yewna zîndan danê afernayene. Xora tepişteyê nêweşî mergî rê ameyî caverdayene. Heta ke tecrîd nêqedîyo demokrasî do nêro. Ganî her kes na raştîye vîno û goreyê ci têbigero. Ma tecrîdî qebul nêkenê. Ma ciwîyayîşê bi tecrîdî çirey qebul nêkenê û do nêkerê. Ganî Komîsyonê Cipêrsayîşê Hewanê Merdiman ê Meclîsî bitaybetî na babete ser o vindero.''

Turkdogan: Kurdî qerqilîyenê

Ozturk Turkdoganî zî vat: ''Îmrali de qerarê bi keyfî yenê dayene. Hukmat ganî na bêhuqûqîye îzah bikero. Reyna ganî Mehkemeya Qanûnê Bingeyî û MHME zî derheqê muracatanê qedexeyê pêvînayîşanê Îmraliyî de qerar bidê. Nê muracatî rewna bîyî, wa hînî cewabê înan bêro dayene. Abdullah Ocalan têna semedê keyeyê ci nê şarê kurdî rewşa ey teqîp keno. Semedê kesê winayên eke qedexeyê pêvînayîşî yê wina dergî bibê xora şar qerqilîyeno.

Ganî Tirkîya meseleya kurdî reyna bigero rojdemê xo û na çarçewa de rewşa Abdullah Ocalanî newe ra qisey bikero. 22 serrî şima senî eşkenî yew merdimî têna bitepişê? Ganî qararê MHME yê Derheqê Abdullah Ocalanî bêro caardene. Ganî tarîxê tehlîyeya ci Abdullah Ocalanî rê bêro vatene û goreyê serran û weşîya ci no tarîx zî ganî tarîxo nêzdî bo. Heta tecrîd nêqedîyo Tirkîya de haştîye nêbena. Tirkîya de heme prosesê haştîye pê Abdullah Ocalanî ameyî destpêkerdene. Ma rewşa Abdullah Ocalanî meseleya kurdî ra cîya nêgenê dest.

Sîyaset ganî rolê xo kay bikero. CPT zî wina vano, 'ma rolê xo ard ca, sîyasetmadarî wa çareser bikerê' Komîteya Wezîranê Konseya Ewropa, serkretê pêroyîye yê înan Meclîsê Parlamenteran ê Ewropa ganî zaf şiro înan ser. Ma do reyna semedê tepişteyan wezîrîye de pêvînayîş bikerê. Eke grevê bibo bêdem rewşe tehluke zaf beno pîl. Waştişê tepişteyan fermî û meşru yê ganî bêrê caardene.''

Marhan: Bano ke netîceya ci zaf bibo giran

Bariş Marhan zî vat: ''Ganî semedê pawitişê heqê weşîye û cuya yê tepişteyan hîsgêr bêro têgêrayene. Beno ke netîceya ci zaf bibo giran. Grevê vêşanîye ya ke 2018 de dest pêkerd û 2019 de qedîya de tay tepişteyan penîya cuya xo ard bi.  Seba ke reyna netîceyê winayên mevejîye werte ganî cade çîyêk bêro kerdene. Berpirsîyarîye Wezîrîya Edaletî û hukmatî de ya.

Xora zîndanan de binpaykerdişê pîlî estbî,  pîya bi janî nê binpaykerdişî zafêr bîyî. Pê despêkerdişê grevê vêşanîye zî binpaykerdişê heqanê dilab-hîrlab zêdîyayî. Kargoyî, mektubî, kovare û rojnameyî û malmezemeyê pakkerdişî nêdîyenê înan. Kantîn de her çî zaf vay o, sewqê nêweşxaneyên nêbenê. Cigêrayîşê koguşan zêdîyayî hûmara gardîyanan zafêr bîye. Tepişteyê ke grev de ye şeker sol û lîmon nêdîyenê înan ya zî zaf tay dîyenê. Cipêrsayîş û cezayê dîsîplînî zî bîyî zaf. Bitaybetî semedê vêşnayîşê înfazê tepişteyan û astenkerdişê tehlîyeya înan cezayî yenê dayene.

Seba ke nê grevê vêşanîye bêdem bidor benê rayrapêroyîye înan rind fehm nêkeno. Vanê qey meseleyê cîddî yê weşîye nêqewimîyenê. La rîsko pîl esto. Tepişteyê vanê heta ke waştişê ma mero ca ma çalakîya xo rê dewam kenê. Xora waştişê înan huqûqî yê. Şar ganî wayîrê tepişteyan vejîyo. Avûkat û huqûqasî zî ganî veng bidê wezîrîye.''