Serekê Verênî yê Baroyê Amedî Avûkat Mehmet Emîn Aktarî operasyonê vera HDPyî ANFyî rê ercnayî. Aktarî vist vîrî ke serra 2014î de HDPyî hesabê xo yê medyaya komelkîye ser o kombîyayîşê MYKyî ra dima tweetî pare kerdî. Aktarî da zanayene ke seba ke merdimî nê kombîyayîşan ra dima vejîyayî meydanan HDP gêrîya binê tehqîqatî.

Aktarî vat: ''Serra 2015î de na mesele de îfadeyê tay kesan yeno girewtene. Mesele ser o zaf nêno vindartene. Dima mesele şina heta wekîlanê HDPyî. Dewaya Selahattîn Demîrtaşî serra 2016î de nê tehqîqatî reyde ameye pêserkerdene. Demîrtaş ê wextî sey 'berpirsîyarê serebûtan' nêdîyeno. Dima zî Merale Daniş Beştaş û Ayhan Bîlgen rê zî heman tehqîqat dîyeno akerdene. Na babete de birê Mehkemeya Qanûnê Bingeyî estê. Yewa ci derheqê Ayhan Bîlgenî de yewa bîne zî derheqê Beştaşe de ya. Wird biran de zî Mehkemeya Qanûnê Bingeyî hukm dana ke îdîa seba tepiştişê Bîlgen û Beştaşe qîm nêkena.''

Aktarî bale ante wextê operasyonan ser û vat: ''Mabênê serranê 2002015î de prosesê çareserîye de derheqê meseleya kurdan de nîqaş û dîyalogî ameyî kerdene. Dewlete nika xîret kena ke prosesê ê çaxî çin bihesibna. Dewleta wina kena ke seke 'prosesê çareserîye' qet nêqewimîya. Dewlete xîret kena ke aktoranê prosesî çin bihesbina û înan ceza bikera. Nê operasyonan ra netîceyêke do nêvejîya werte. Çunke nika Mehkemeya Qanûnê Bingeyî binê tedaya îqtîdarî de ya. ''