Konferansê bi sernameyê 'Vera Sîyasetê Tecrîdî Heqê Haştîye' bi organîzasyonê Komeleya Heqanê Merdiman (ÎHD), Weqfa Cigêrayîşê Huqûqî ya Komelkîye (TOHAV) û Komeleya Huqûqnasan a Seba Azadîye (OHD) ame kerdene.

Beşê verênî yê konferansî de Hemsereka ÎHDyî Erene Keskîn qisey kerd û îfade kerd ke kemalîst û îslamîstî dişmenîya kurdan û Kurdîstanî de benê yew. Keskîne vat: ''Îmrali de sîstemêko îlegal awan bîyo. No sîstem pabesteyê Dayîreyê Şerê Taybetî yo. Hêz û rêxistinê mîyanneteweyî vera bêhuqûqîyanê Tirkîya bêveng ê la hêzê kurdan est o ke bi sereyê xo heqê nînan ra bêrê. ''

Dima Avûkatê Buroyê Huqûqî yê Asrinî Cengîz Yureklîyî qisey kerd û da zanayene ke tecrîdo ke cezayêka tewr giran a, nêno qebulkerdene. Yureklîyî vat: ''Tecrîdê vera Ocalanî incomunicado yo. Incomunicado metodêkê îşkenceyî yo û no metod warê mîyanneteweyî de qedexe yo. CPTyî zî no pênase seba Îmraliyî şuxilnabi. Ganî CPT şoro Îmrali la wina nêkeno.''

Sekretera Pêroyî ya OHDyî Rengîne Ergul beşê diyînî yê konferansî de qisey kerd û bale ante 'heqê hêvîye' ser. Ergule vat: ''Birêz Ocalanî rê cezaya muebede dîyabi. Goreyê qanûnî ê sîyasîyan ra ber tepişteyê winasênî wextêkî ra dima vera bidîyê. Bi nê hawayî 'heqê hêvîye' yê tepişteyanê sîyasîyan yeno binpaykerdene. Mehkemeya Heqanê Merdiman a Ewropa (MHME) zî tesbît kerd ke no heqê Ocalanî yeno binpaykerdene.''

Hemserekê ÎHDyî Ozturk Turkdogan zî qiseykerdişê xo de heqê hêvîye ser de vindert û vat: ''Tirkîya seba ke aramî bina ganî vizêrê xo de têrî biba. Tirkîya ganî seba meseleya kurdan metodanê çareserîye yê haştîgîran bivîna. Rayîrê ney zî çareserkerdişê tecrîdî yo.''

Peynîya konferansî de Endama Heyetê Rayberdişê Merkezî yê ÎHDyî Nuraye Çevîrmen netîcenameyê konferansî wend.

Çevîrmene ard ziwan ke bi taybetî 15 serranê peyênan de tepişteyê sîyasîyî raştê cîyakerîye yenê. Çevîrmene vat: ''Ganî bendê TMK, qanûnê ceza, qanûnê înfazî yê TMKyî yê vera tepişteyanê sîyasîyan bêrê wedaritene. Ganî meseleyî çareser bibê û birê MHME bêrê caardene. Tepişteyê nêweşê ke bi biranê ATKyî yan zî bi bahaneyan raştê cîyakerîye manenê, zîndanan de terkê mergî benê.

Wedaritişê tecrîdî seba haştîye gamêka girîng a. Nê şert û mercan de bi sîyasetê şerî yê bi nameyê operasyonanê teberê sînorî û bi isrardarîya tecrîdî xîret yeno kerdene ke tecrîd vila bibo. La ganî merdim sîyasetê pawitişê cuye bikero. Ganî cade peynîya caardiş û sîyasetê cîyakerîye bêra, tepişteyê nêweşî vera bidîyê, heqê înan ê tedawî bêro caardene, ganî cezaya muebede biqeda, Zînanê Îmraliyî bêro qefilnayene û tecrîd bêro wedaritene. Seba welatî çareserîya demokratîke ya meseleya kurdan lazim a.''