Almanya de şayîya Newroza merkezîye 19ê  adare roja şemeyî do Frankfurt de bêro kerdene. Amadekarîye şayîye temam bîyî. Hemsereka KON-MEDî Zubeyta Zumruta ke Komîteya Amadekarîya Newroze de ca gen derheqê şayîya Newroze ya Frankfurtî de qisey kerd.

Zumrute vat: ''Ma pîya bi temsîlkaranê bi desan partî û dezgehan pîya amadekarîye xo yê Newroze kerdî û resaye merhaleya peyêne. Şayîya Newroza ke do Rebstockê Frankfurtî de 19ê adare de bêro kerdene programê ci yo zengîn  ê kulturî esto. Çar leteyanê Kurdîstanî ra do temsîlkarê dezgehan sey qiseykerdogan tewrê şayîye bibê. Her hetê Almanya ra meclîs, komunî, dezgehê ke pabesteyê ma yê otobosê xo amade kerdî ke şarê ma bikirişê warê Newroze.

Ganî ma Newroza emserê bikerê Newroza azadîya Rayber Apo û bi hezaran tepişteyanê sîyasîyan. Ma do Newroze de cewabê hêrişê qirkerdişî bidê.  Xeylêk endamê partîyanê Almanya sey  CDU, SPD, Die Linke zî do tewrê Newroze bibê û mesajanê paştdayîşî bidê.''

Zumrute semedê tewrbîyayîşê Newroze veng da kurdan û dostanê înan û vat: ''Şayîya Newroze 19ê adare roja şemeyî, saete 10. 00 de do dest pêbikero. Koma Bajar, hunermendî Şehrîbana Kurdî, Nasir Rezazî, Hozan Dîno, Xecê, Cherif Omerû û Koroya Dengê Mezopotamya  zî do bi deyîranê xo tewrê Newroze bibê. Reyna ekîbê folklorî zî do rengê xo bido Newroze.''