Şaristanê Stuttgartî yê Almanya de seba Rojawanî şewa paştdayîşî ameye serûberkerdene. Şewe de bi fotografanê endamê Konseya Rayberdişî ya KCKyî Zekî Şengalî, fermandarê HPGyî Atakan Mahîrî, alaya PKKyî û Rayberê Şarê Kurdî Abdullah Ocalanî pankartê bi nuşteyê ''Kurdîstan do azad bibo'' ame daliqnayene. Aktîvîteya paştdayîşî Merkezê Kulturî yê Arena de bi deqayêkê rêzgirewtişî dest pêkerde. Şewa paştdayîşî de qirseyî pêro pîya marşê ''Çarxa Şoreşê'' wend û sloganê ''Biciwîyo Serek Apo'', ''Cinîye, Cuye, Azadîye'' ameyî vatene. Temsîlkara PYDyî  Zozane Rojava şewe de qisey kerd û îfade kerd ke prosesê şorişî de şaê Rojawanî rastê hêrişanê giranan ê dişmanan yeno. Aktîvîte de Koma Mîrî, Koma Hezex, Simar, Cemal Koçgirî û Denîz Deman vejîyayî sehne ser.

Şaristanê Hamburgî yê Almanya de zî şewa paştdayîşî ya Rojawanî ameye serûberkerdene. Aktîvîte Salona Pkonixî de ameye kerdene û wekîlê Partîya Çepe Martin Dolzer zî tede zaf sîyasetmedar û aktîvîstê almanî û zaf kurdîstanijî zî tewrê aktîvîte bîyî. Şewe de hemserekanê DKTMî yê Hamburgî Abuzer Bîlenlerî û Bîrgule Ozpolat qisey kerd û dima zî Sîyasetmedaro Kurd Şerwan Çewlîgî qisey kerd.

Şerwan Çewlîgî bale ante xoverdayîşê Têgêrayîşê Azadîye yê Kurdan ser û vat netîceyê nê xoverdayîşî ewro Rojawanî de yenê dîyene. Çewlîgî vatişê Pîr Seyîd Rizayî yo ke vatêne: 'Ez nêeşkaya vera zuran û kayanê şima şora sere no mi rê bi derd la mi zî şima ver de zanî nêna ro no zî şima rê bibo derd.' vist vîrî û vat rixmê heme hêrişanê îşxalkeran  do şarê Kurdî rayberîya têgêrayîşê azadîye de ser bikewo. Nê têgêrayîşî senî ke heta nika destkewteyê girdî fînayî dest do ewro ra tepîya zî  bi xurtkerdişê têkoşînî  ser bikewo.

Cayê aktîvîte bi fotografanê Sakîna Cansiz, Mahsum Korkmaz, Kemal Pîr û Mehmet Karasungurî ame xemilnayene. Şewe de Pinare Aydinlar, Koma Silbûs û Tarî, Celovîz, Bengîne Efrînî, Lorenz Amûdî û Govendê Sipan Amara vejîyayî sehne ser û derheqê tarîxê PKKyî yê 41 serre de sînevîzyonêk ame mojnayene. Aktîvîte bi govendan dewam kerd.