Par sibate de bi merasîmêkê beşdarîya Erdoganî keştîya Pîrî Reîs ameye nişnayene awe. Sere de Erdogan selahîyetdaranê dewleta tirke îdîa kerdêne ke na keştîye bi keştîya bindengizî ya verêne ya' û 'rûmetê dewleta tirke ya.' La keştîye parçeyê keştîye hetê ThyssenKrupp Marine Systems (TKMS) ra virazîyaye û heta seba 5 keştîyanê bindengizî zî parçeyî hê yenê amadekerdene. Seba nê keştîyan garantîya kredî ya bi nameyê Hermesî zî hetê Almanya ra dîyaye Tirkîya.

Rixmo ke mabênê Almanya û Tirkîya de hende krîzî estê kredîya Hermesî nêameye vindartene. Partîya Keskan seba ke kredî bêra vindartene têgêraye.

Goreyê kovara Der Spiegelî Partîya Keskan seba ke keştîyan teslîmê Tirkîya nêrê kerdene vernîyazêk amade kerd. Yeno pawitene ke nê hewteyî vernîyaz pêşkêşê Meclîsê Federalî bêro kerdene. Vernîyaz de yeno vatene ke semedê îşxalê dewleta tirke yê vera Rojawanî û binpaykerdişanê Tirkîya ra ganî bazirganîya Almanya bi Tirkîya bêra betalkerdene.

Vernîyazo ke hetê pispora asayîşî ya Keskan Katja Keul ra ame amadekerdene wina yeno vatene: ''Tirkîya hetêkî ra Yunanîstanî rê gefan wanena û hetêkî ra zî heqanê merdimanê xo binpay kena. Coka bazirganîya Tirkîya û Almanya têgêrayîşêko raşt nîya.''

Yeno pawitene ke Partîya Çepgîre û Partîya Demokrate ya Sosyale (SPD) zî do paştî bidê vernîyazê keskan.