Karê ajanîye yê ke hetê rejîmê Erdoganî û MÎTî ra Almanya de yenê kerdene hetê her kesî ra zanîyenê. MÎTî camî, komele, konsolosxane û şubeyanê banka de û tewr zêdêr zî eyaletê Nordrhein Westfalen (NRW) de xo rêxistin kerd. Wezaretê Karanê Zereyî yê NRWyî no zanayîş pare kerd.

Endamê Partîya Sosyale-Demokrate (SPD) ya Meclîsê Eyaletê NRWyî Serdar Yukselî hewteyê vîyarteyî de vernîyazêk pêşkêşê îdareyê eyaletî kerdbi. Vernîyaz de rîskê asayîşî yê muxalîfanê rejîmê Erdoganî ame persayene.

Wezaretî vizêr cewab da vernîyaz. Wezaretî eşkera kerd ke derheqê planê hêrişî yê MÎTî de zanayîşêk çin û babeta 'neteweperweranê tirkan ê hukmatê tirkî' de hîşyarîye daye.

Wezaretê Zereyî da zanayene ke beno ke neteweperestê tirkî hêrişê muxalîfan bikerê û hukmatê tirkî muxalîfê Almanya sey 'terorîst' vîneno. 

Ame parekerdene ke MÎT karê xo de giranîye dano komele û kesanê ke nêzdîyê PKK, DHKP-C, MLKP û Têgêrayîşê Gulan ser û nê komele û kesan qeyd keno.