Amed de 19 sîyasetmedar û sendîkagerê ke hewteyo ravêrte ameybî destbendkerdene înan ra 14 kesî ameyî tepiştene. Platformê Kede û Demokrasîyî yê Amedî tepiştişî protesto kerdî û mesajê pîlkerdişê têkoşînî dayî.
Amed de Amed de 19 sîyasetmedar û sendîkgerê ke 8-9ê teşrîna peyêne de ameybî destbendkerdene û demê nezaratê înan amebi dergkerdene înan ra 14 kesî ameyî tepiştene.
Kesê ke vejîyayî mehkeme bi vatişanê şahîdê/a nimite/nimitîye sey 'endamê rêxistine' ameyî sûcdarkerdene. Vervejîyayîşê vera qeyûman,şîdetê serê cinîyan, bindetstkerdişê endamanê Egîtîm Senî û tewrbîyayîşê eşkerayîyanê serrgêra şahadetê Musa Anterî û Qirkerdişê Helepçe zî sey sûcî ameyî hesibnayene.
Mehkeme de 5 kesî serbest veradîyayî 14 kesî ameyî tepiştene. Kesê ke ameyî tepiştene nameyê înan wina yê: Îdarekarê HDPyî yê Amedî Mehmet Asana, Hemserekê HDPyî yê Baglarî Nasir Yenter û Îdarekarê Qeza Huseyîn Baran, Hemserekê HDPyî yê Bismilî Şakîr Demîr, Endamê Heyetê Îdareyanê Cayîyan ê HDPyî Omer Fîlîtolgu, îdarekarê DBPyî yê Amedî Yasemîne Akengîn, Mehmet ALî Alkan, Mehmet Suslu û Abdullan Dengîz, Hetkarê Serekê PSKyî Bayram Bozyel, Îdarekarê Merkezê Pêroyî PSAKD Erkan Keskîn,Îdarekara SESî ya Şaxê Amedî Gulhan Tekîn, Hemsereka Egîtîm-Senî Arzû Koç, Endama Meclîsa Mayanê Haştîye Nezîfe Yîgît.
Hetê bînî ra Platformê Kede û Demokrasîyî yê Amedî tepiştişê 14 kesan protesto kerd. Eşkerayîya ke Yenîşehîr de ameye kerdene pîya Parlamentera HDPyî ya Amedî Remzîye Tosun îdarekarê DBP û ESPyî zî tewrê ci bîyî. Vervatoxê Paltformî Mehmet Ceylanî ke eşkerayîye de qisey kerd arad ziwan ke pê tepiştişan yeno waştene ke rojdem bêro bedilnayene. Remzîye Tosun zî tepişnayîşê sîyasetmedaran sey tîyatroyî name kerd û vat: ''14 kesî bîlasebeb ameyî tepiştene. Kurdê ke haştîyê wazenê û vera zulmî sere berz kenê, hedefê înan de yê. Ne zîndan ne kiştiş eşkeno ma vindarno. Ma rixmê heme hêrişan têkoşînî rê do dewam bikerê.''
