Amed de komeleyanê  MED TUHAD-FED û TUHAY-DER  bi eşkerayîyêke bale ante rewşa tepişteyan ser. TJA, HDP, DBP, OHD, Komeleyanê 78an, MED-DER û xeylêk kesan zî paştî daye çalakîye.

Verî eşkerayîye Hemserekê MED TUHAD-FEDî Zekî Baranî ard ziwan rojanê peyênan de zîndanan de qetilkerdişî qewimîyayî û vat: ''Dewleta tirke vera tepişteyanê sîyasîyan polîtîkaya qirkerdişî reyra bena. Yew serra peyêne de 48 tepişteyî ameyî qetilkerdene. Nê qirkerdişî rîyê sîstemê faşîzmî yê îqtîdarî ra qewimîyayî. Hukmat tim şarî xapîneno û vano ê do eleqedarê meseleya zîndanna de bibê la pratîk de gamêke nêerzeno. Gama ke vîjnayîş beno nizdî îqtîdar beno dostê kurdan. Siba ke îqtîdar beno wa bibo eke nizdîbîyayîş wina bo kurdî reyna zîndanan de yenê înfazkerdene. Ganî şarê kurdî zafêr wayîrê tepişteyan vejîyo vengê înan bido eşnawitene.''

Dima ra eşkerayîye hetê Hemserekê TUAY-DERî Mehmet Gurbuzî ra ameye wendene. Gurbuzî vat: ''Birêz Abdullah Ocalan 23 serrî yo binê tecrîdê giranî de yo. No tecrîd tesîrê heme komelî keno. Zîndanî açarîyayî merkezê îşkenceyî. Hukmato ke her hetî ra mîyanê krîzan de yo seba ke enkazê xo binimo beno sebebê merganî zîndanî.Tepişteyê ke cezayê înan qedîyaya zî bîlasebeb înfazê înan yenê vêşnayene ke weş zîndanî ra mevejîyê. Emser 43 cenazayî zîndanan ra vejîyayî.  No îşkenceyê zîndanan fîneno çiman ver. Êyê ke benê sebebê nê mergan peynî ra tewr peynî do verê huqûqî de hesab bidê. Ma tîya ra reyna veng danê ke wa tecrîdê serê Birêz Abdullah Ocalanî bêro wedaritene û pêvînayîşî bêrê kerdene. Ganî tepişteyê nêweşî cade bêrê veradayene û înfazê înan bêrê peydeeştene. Ma do çirey vera îşkenceyê zîndanan bêveng memanê. Ganî her kes wayîrê tepişteyan vejîyo vera neheqîye vengê xo berz bikero.''