Amed û Dêrsim de operasyonê qirkerdişê sîyasîyî de sîyasetmedarî zî tede xeylêk kesî ameyî destbendkerdene.

Amed de polîsan serê sibayî eşt xeylêk adresan ser. Operasyonan de Hemşaredaro verên ê HDPyî yê Kayapinarî Necatî Pîrînçoglu, Hemşaredarê verênî yê HDPyî yê Erxanî Ramazan Kartalmiş û Mervane Yildiz, Îdarekaro verên ê HDPyî yê Amedî Tarik Yazgan, Ridvan Ezel û 5 kesê ke Şaredarîya Erxanî de xebitîyenê û nameyê înan nêzanîyenê, ameyî destbendkerdene.

Dêrsim de çarçewa tehqîqatêkê Serdozgerîya Komare de serê sibayî polîsanê tirkan eşt keyeyan ser û bi îdîaya 'endamîya rêxistine' merkezê Dêrsimî de Eser Kaya, qezaya Pêrtagî de Kemal Ag û Burak Kurban û qezaya Pilurî de zî Berdan Tosun destbend kerdî. Destbendkerdeyî ameyî berdene bi Mudirîya Asayîşî.