Baroyê Amedî, ÎHD, OHD, KESK, MED TUHAD-FED, TMMOB zî tede xeylêk rêxistinanê komelê sîvîlî Amed de bi eşkerayîya hempare semedê serbest veradayîşê tepişteyanê nêweşan veng da. Eşkerayîya ke Parka Koşuyolu de ameye dayene de nê ameyî vatene:

''Kapasîteyê zîndanan 220 hezar o la 294 heyar tepişteyî tede manenê. Seba ke heqê tepişteyan yenê binpaykerdene û tepişteyî raştê zextî yenê çend şino hûmara nêweşan zêdîyena û rewşa nêweşan giranêr bena. Xora demê peyênî de hûmara mergan zî zêdîyayî. Her roje zîndanan ra cenazayî vejîyenê. Bi tewirê keyfî tehlîyeyî yenê astengkerdene. Koguşî sixletî yê, wesayîtê neqlî tengê, muayenî kelemçeyîn yenê kerdene, nêweşî erey yenê berdene revîrî û sewqî kewenê erey ya zî qet nêbenê, koguşî germin nêbinê ya zî hewa nêgenê, doktor û personelê weşîye zîndan de tay ê, werê dîyetî nêdîyeno û awe pake nîya û xeylêk problelmê bînî estê. Bi qala kilmê heme heqê tepişteyan ê esasî yenê binpaykerdene û tepişteyê nêweşî mergî rê ameyî caverdayene. Ganî nêweşê giranî cade bêrê verdayene cayê merdimanê xo de bêrê tedawîkerdene. 2 serranê peyênan de zîndanan de 64 tepişteyanê nêweşan zîndanan de dinyaya xo bedilnaye. Ganî selahîyetdarî cade semedê tepişteyanê nêweşan têbigêrê. Wa cade zextê serê tepişteyan bêrê vidarnayene ke ê bieşkê heqanê xo bişuxulnê û tepişteyê nêweşî cade bêrê veradayene. Wa derheqê îşkenceyê zîndanan de cipersayîşê xoser û bêhetî bêrê kerdene.''