Taxa Çulî ya qezaya Rezanî ya Amedî de 21ê tebaxe ra nata Narîne Gurana 8 serrî vindîbîyaye bîye. Ewro cenazaya ci badê 19 rojan zereyê ciwal de verê dereyî de nimite  ameye dîyene.  Amed de serkêşîya  Têgêrayîşê Cinîyan ê Azadan (TJA) Partîya Herêmanê Demokratîkan (DBP) û Partîya Têduştîye û Demokrasîyî ya Şaran (DEM Partî) semedê Narîne Guran rayraşîyayîş ame organîzekerdene.

Hemserekê Pêroyî yê DBPyî Keskin Bayindir û Çigdeme Kiliçgun Uçar, Hemvervatoxê HDKyî Cengiz Çiçek, wekîl, hemserekê bajara û qezayan û hemşaredarê DEM Partî, endamê Komeleya Paştgêranê Amedsporî û bi hezaran kesî tewrê rayraşîyayîşî bîyî.

Bi hezaran kesê ke semedê Narîne Guran vejîyayî meydanan bi slogana '' Kiştox Hîzbûllah hemkar AKP'' rayra şîyî.  Çalakîye de sloganê sey ''Narin zaroka gelê me ye'', ''Narin zarok e kujerê wê dewlet e'' ameye vatene û dovîzê sey ''Kuştina zarokan politik e!'' ,''Destên xwe ji ser zarokan bikşînin!'' ameyî kiriştene. 

Vera ablûqaya polîsan şarî bi slogana ''Şarî rê nê kiştoxan rê barîkat'' cewab da.  Girseyî ablûqayê polîsan rijna û heta Parka Koşuyolu rayra şi û dima ra çalakîya roniştişî kerde.

Tîya verî Sereka Komeleya Cinîyan a Rosa Suzane Işbilen qisey kerd. Işbilene vat: ''Seba ke Narîne bînî memirê ma tîya ameyî pêser. Cigêrayîşo ke 20 rojî yo yeno kerdene semedê nimitişê kiştoxan bi. Coka ma nê edaletê camêrdî protesto kenê.''

Dima bi nameyê dezgehanê cinîyan û domanan eşkerayîye kurdkî û tirkî ameye wendene.

Hemşaredarê Bajarê Pîlî yê Amedî Dogan Hatunî vat: ''Ma qehrîyaye yê hem zî hêrsbîyaye yê. Seba ke ma wayîrê domananê xo nêvejîyayî, wayîrê komelê xo nêvejîyayî komelê ma cum bîyo. Ma komelê xo ra vanê ke ma verî nê cumbîyayîşî ra bivejîyê. Na dewlete de qet qanûnêk domanan û cinîyan nêpaweno.  Ma sey şaredarîye ozrê xo wazenê. Ganî ma nê serebûtanê leyminan werte ra wedarê.''

Hemsereka Pêroyî ya DBPyî Çigdeme Kiliçgun Uçar zî vist vîrî ke Kurdîstan de domanbîyayîş senî zehme to û bale ante serê domananê ke binê panzeran de mende. Çigdeme Kiliçgun Uçar nê vatî: ''19 rojî berpirsîyarîyanê na dewlete se kerd? Medyaya paştgêrê îqtîdarî xebere açarna magazînî. Şarê ma tîya sloganêka tarîxî vate. Vat ''Kiştox Hîzbûllah''. Wezîrê Karanê Zereyî yê nê welatî semedê Hîzbûllahî vat ''Ma do 10 serrî cuwa pê netîce bîgêrê''. A roje ra nata Hîzbîkotnra veng nêvindeno.  Cinîyî yenê tehdîtkerdene. Kafeyî yenê sereştene. Kesê ke eşt kafeyî ser DAÎŞî ra yo. No îqtîdar heme kesê ke dişmenê kurdan ê înan dir îtîfaq kerd û Kurdîstan newe ra dîzayn kerd. Narîne bîye qûrbanê nê polîtîkayan. Şima kerdoxî wazenî? Kerdox no zîhnîyet o. Hedefê nê zîhnîyetî hesilnayîşê komelî yo. Kenê ke fuhuş û madeyê kungkerdişî bikerî normal. Ganî ma xo bipawê. Verê AZC Plaza de bi gazî hêrişê embazanê ma kerd. Derheqê dosya de qerarê nimitişî ame girewtene. Ma do AKP-MHP û îtîfaqanê ci yê leyminan bi '2Jin Jiyan Azadî'' bifatisnê. Êyê ke wazenê kurdan bi erjan, bawerî û têkoşînê ci cîya bikerî, rikê înan ra ganî ma nê têkoşînî xurtêr bikerê. Ma do desturê Narîne neweyan mede.''