Ronayoxanê PKKyî ra Sakîne Cansiz, Temsîlkara KNKyî ya Parisî Fîdane Dogan û Endamê Têgêrayîşê Ciwanan Leyla Şaylemez 9ê çeleyê 2013î de Buroyê Enformasyonî yê Kurdîstanî de, paytextê Fransa Paris de ameybî qetilkerdene. 

Rixmo ke delîlê qirkerdişî îstîxbaratê dewleta tirke nîşan kenê û rixmo ke qirkerdişî 10 serrî xo pey de verdayî edalet nêame caardene. Qirkerdişê Parisî yê 9ê Çeleyê 2013î ra dima cade selahîyetdaranê Fransa û dewleta tirke eşkerayîyê manîpulatîfî dayî. La îdîanameyê Dozgerîya Komare ya Parisî de raştîyî eşkera kerdêne: ''Xeylêk belgeyê prosesî mojnenê ke amadekerdiş û caardişê nê sûîkastî de beno ke engiştê MÎTî est bê.''

Kiştox û tek gumankerdeyê  qirkerdişî Omer Guney 17ê çeleyê 2013î de amebi destbendkerdene û 17ê kanûna 2016î de dewaya qirkerdişî ra mengêke verî bi hawayêkê şikdarî zîndan de merd

Komelê Demokratîkî yê Kurdan ê Fransa serrgêra 10. ya Qirkerdişê Parisî de bi eşkerayîyêke waşt ke wa dewleta Fransa serê dosyaya qirkerdişî ra 'sirê dewlete' wedara û mesuldaran muhakeme bikera. 

Destpêkê qirkerdişî

Qirkerdişî ra serrêke pey dokumentê ke tede Omer Guney sey 'çime' pênase beno û aîdê MÎTî yê çapemenîye de vila bîyî. No zî mojneno ke qirkerdiş karê dewlete yo. 'Notê dewlete' yê 18ê teşrîna peyêne ya 2012î de 'çimeyî' ra yeno waştene ke seba suîkastan amadekarîya xo bikero. 

Belgeyo ke 14ê çeleyê 2014î de medya de weşanîyayo, teşrîna peyêne ya 2012î de 'Çime'yî (Lejyoner) rê ferman erşawîya. Dokumentê MÎTî hetê O. Yuret, U.K. Ayık, S. Asal ve H. Ozcanî ra amebi îmzakerdene. Dokument de ameyêne vatene ke Sakîne Cansiz (Sara) seba ke pasaportê xo newe bikera Almanya ra şîya Fransa û bi hetkarîya 'Çime'yî karê xo safî kerdî. Dokument bi hawayêkê eşkerayî ameyêne vatene ke va Çime (Lejyoner) seba ke verê fealîyetanê ci bigêro Sakîne Cansiz bikişo.

Zîndanî ra remnayîş

Nê delîlan ra çend rojî verî 4ê çeleyî de hemkaran Ruhî S. û Umît S. Almanya de zîndan de Omer Guney zîyaret kerd. Pêvînayîş û telefonê înan ameyêne goştarîkerdene. Çime Omer Guneyî MÎTî ra waştêne ke wa ey zîndanî ra biremno. Polîsan eşt keyeyê Ruhî S.yî ser û planê remnayîşî dîyî.

Omer Guneyo ke 17ê çeleyê 2013î de amebi tepiştene 17ê kanûna 2016î de bi hawayêkê şikdarî merd. Dewaya ci mengêke ra pey do 23ê çeleyê 2017î de dest pê bikerdêne. Mergê Omer Guneyî ra dima dosyaya qirkerdişî bi hawayêkê fîîlî qefilîyaye.

Mehkemeyêka newîye ameye waştene

Keyeyanê hîrê cinîyan ê şorişgêran destpêkê serra 2017î de waşt ke wa tehqîqat dewam bikero û bi rayîrê avûkatan muracatê Dozgerîya Parisî kerd. 12ê adara 2018î de keyeyan newe ra gerre kerd û waşt ke dadgerêk seba tehqîqat bêro wezîfedarkerdene. Belgeyê ke mojnenê MÎTî qirkerdiş plan kerod teslîmê Dozgerîya Parisî ameyî kerdene.

Osloyî ra vengê Ozanî

O çax belgeyêko newe eşkera bi; 2011 de Şefê MÎTî Hakan Fîdan Oslo de heyetê PKKyî de pêvînayîş kerdêne selahîyetdarêkê MÎTî 'Ozan' uca de bi. Ozan 3ê temmuza 2008î ra heta 5ê temmuza 2011î tewrê pêvînayîşanê Osloyî bi. Dima ke qeydê vengî vejîyayê werte kurdanê beşdaranê nê pêvînayîşan da zanayene ke qeydan de keso ke planê suîkastî 'çime' de nîqaş keno vengê ci maneno vengê Ozanî.

Îtîrafê 2 selahîyetdaranê MÎTî

ANFyî 10ê çeleyê 2018î de îtîrafê endamanê MÎTî weşanayî. Endamê MÎTî Erhan Pekçetîn û Aydin Guzel Başurê Kurdîstanî de verî ke vera kadroyanê PKKyî sûîkast bikerê ameybî tepiştene. Înan îtîraf kerd ke dokumentê MÎTî de îmzayê kamî estbî û wezîfeyê înan çita bîyî:

Ugur Kaan Ayik: Serekê Fealîyetan ê Taybetan ê MÎTî. Wextê qirkerdişî de Serekê Dayîreyê Fealîyetan ê Etnîkan ê Teberê Welatî bi.

Oguz Yuret:2018 de Wan de serekê dayîreyê taybetî bi, 2013 de mudirê operasyonan bi.

Sabahattin Asal: 2018 de Hetkarê Musteşarê îstîxbaratî bi, 2013 de Hetkarê Serekê Dayîreyê Fealîyetan ê Etnîkan ê Teberê Welatî bi.

Ayhan Orhan: Endamê Şubeyê Operasyonan o.

Goreyê îtîrafan Sabahattîn Asalî qirkerdiş plan kerd. No kes mîyanê heyetê Îmraliyî yê dewlete de zî bi û hetkaro verên ê Musteşarê MÎTî Hakan Fîdan bi.

Pekçetînî îtîraf kerd ke qeydê vengî yê kombîyayîşê MÎTî Anqara de bi. Pekçetînî vat ke bê destûrê Erdoganî ê nêeşkayêne qirkerdişêkê winasênî bikerê. Pekçetînî vat: ''Kesê ke dokumentê arzî de bîyî bi lezî ameyî terfîkerdene.'' Pekçetînî tîya de qala Oguz Yuret, Ugur Kaan Ayik û Ayhan Orhanî kerdêne.

Qeydanê vengan de Erhan Pekçetînî vato ke qirkerdişo winayên bê destûrê Erdoganî qetî nêno kerdene. 

Sersefîro tarî

 Ê prosesê Qirkerdişê 9ê Çeleyî de Berukselê Belçîka de zî çîyêko ecêb qewimîya. Hezîrana 2017î de vera Hemserekê KONGRA-GELî Remzî Kartal û Endamê Konseya Rayberdişî ya KCKyî Zubeyîr Aydarî xîretê suîkastî ame kerdene û 18ê hezîrana 2021î de bire dîyaye ke dewa bêra kerdene. 1ê teşrîna verêne ya 2021î de roniştişo verên ê dewa ame kerdene. Na dewa torra ajanîye ya dewleta tirke û Qirkerdişê Parisî tay roşnî kerde. Vejîyabi werte de Sersefîro verên ê Parisî yê Tirkîya Îsmaîl Hakki Musa zî tede xeylêk kesan Qirkerdişê Parisî de rolêk kay kerdêne û goreyê dokumentan nê kesî hetê Musayî ra ameyê koordînekerdene. Îsmaîl Hakki Musa sersefirîya Parisî ra verî MÎTî de 'merdimo diyîn' bi. 

Qirkerdişê Parisî ra verî Musa sersefîrê Brukselî bi. Sersefîrîya ci ya Parisî de 17ê kanûna 2016î de Omer Guney zîndan de merdbi û dewa bi hawayêkê fîîlî qefilîyaye.

Gelo Ewropa do terorî ra Tirkîya muhakeme bikera?

Dozgerîya Parisî serebûtê Brukselî ra dima gulana 2019î de bire daye ke dosya newe ra bêra ercnayene. Seba tehqîqatê hemkaranê Omer Guneyî dozgerêko newe ame wezîfedarkerdene. Torra ajanîye ya hîra ya Fransa, Belçîka û Almanya zî gêrîyaye binê tehqîqatî.

Serrgêra 10. ya Qirkerdişê Parisî de pêro parçeyanê puzzle nêameyî cakerdene. Hema zî şikî est ê. Selahîyetdarê dewletan hema zî bi çêrî tênêgêrenê û babete ser de sînyalî nêdanê. Tecrubeyî mojnenê ke 'sirê dewlete' pawitişê mesuldaran û israrê bêcezaverdayîşî, hemkarîya sûcî ya.