Taxa Turkozoyî ya qezaya Mamakî ya Anqara de şan kesanê bi nameyê D.G., S.G. û kesêkê bînî hêrişê Volkan Temelî kerd. Ame parekerdene ke keyeyê Temelî reya diyîn a maruzê hêrişê nîjadperestî yeno.

Ferda keyeyî Mizgîne Temel derheqê hêrişî de agahîye daye û pare kerd ke 3 kesan hêrişê birayê ci kerdo û ey rê vato ''Tîya Turkozo yo, tîya do bibo goristanê kurdan. Kurdê pîsî, tîya ra def bê.''

Temele da zanayene ke 3 kesan bi sator, kardî û kolîyan hêrişê birayê ci kerdo. Mizgîne Temel vat: ''Ma Şirnexî ra yê. Serrêke ra nata ma hê maruzê nê hêrişan manenê. Ma rê vanê 'kurdê pîsî' û hêrişê ma kenê. Birayê mi 17 serre yo. Hêrişî ra hişê birayê mi şi. Serê çimê ci parçe bîyo. Bi zorî nefes gêno. Ma raporê xo girewt û ewro ma qereqol de gerre kerd. La hêrişkerî nêameyî destbendkerdene. Polîsan ma rê vat 'Verî ke çîyêk bêro sereyê şima keyeyê xo bihewilnê. Ma nêeşkenê înan tepişê, ma encax eşkenê cezaya pereyî bidê înan.' Ma no edalet o?''