Goreyê agahîyanê ke burokratêkê payeberzî yê Anqara dayê ANFyî kombîyayîşê nimiteyî yê bi serekîya Erdoganî de bire dîyaya ke arşîvê OSYMyî bêrê îmhakerdene.

Merkezê Weçînayîş û Cakerdişî (OSYM) verî ke persê îmtîhanê KPSSyî yê 2022yî bêrê diznayene rojdem de bi. Reya verêne eşkera bi ke persê îmtîhanê KPSSyî yê 2010î ameyê diznayene. Nêrazîbîyayîşê şarî ra dima îmtîhan ame betalkerdene la şikê vera OSYMyî nêqedîyayî.

Goreyê agahîyanê ke burokratêkê payeberzî yê Anqara dayê ANFyî Erdoganî çarçewa têkoşînê vera FETOyî de ekîbêka taybete awan kerda û waşto ke pêro îmtîhanê mabênê 2002-2012î bêrê cigêrayene.

Erdoganî no kar bi ekîbêka perwere da kerdene. Sekreterê Pêroyî yê Heyetê Hakîm û Dozgeran Bîlgîn Başarano ke tayînê dozger û hakîman de wayîrê rolêkê girîngî bi, kerd serekê ekîbe. Kombîyayîş de Erdogan û pêro selahîyetdarê MÎTî est bîyî û destûrê kewtişê pêro arşîvan dîya Başaranî.

Na xebata ke tay kesan zanayêne, dewatê werdî de ke Ofîsê Mudirê Pêroyî yê Kavara Turkiye Gunluguyî Mustafa Çalikî kuçeyê Tunusî ya Anqara de dabi, eşkera bi. Dewat de Wezîro verên ê Wezîrîya Perwerdeyê Milîyî Huseyîn Çelîk, Bîlgîn Başaran, 4 walîyî, selahîyetdarê MÎTî û polîsan û 3 wekîlê AKPyî amade bîyî. Dewat de wexto ke qala têkoşînê vera Fetulahçîyan ameyêne kerdene persê dizdîyanê persan ê fetulahçîyan ser o  îmhakerdişê arşîvan û ekîba Başaranî vejîyayî werte.

Çimeyê ANFyî qala vateyanê Başaranî zî kerde. Başaranî derheqê xebate de Erdoganî rê vato 'Çiyo xêrîn qefilnayîşê na mesele ya. Nêbo eke na mesele bêra cigêrayene no do bibo peynîya ma. Başaranî da zanayene ke o çax terefgîrê Fetulahçîyan û AKPyî mîyanê dewlete de ameyê wezîfedarkerdene.

Nê kombîyayîşê Başaran û Erdoganî ra dima zî Erdoganî seba ke serê raştîyanê îmtîhananê OSYMyî yê 2002-2012î bigêro fermanê îmhakerdişê arşîvanê OSYMyî dayo.