Hemserekê FEDA Demîr Çelîkî û pîranê Ocaxê Dervîş Cemalî ra Riza Yagmurî derheqê hêrişanê kîmyewîyan ê dewleta tirke û vêşnayîşê cenazayanê leşkeran de ANFyî rê qisey kerd. 

Hemserekê FEDA Demîr Çelîkî ard ziwan ke artêşa tirke bi çekanê teknolojîya peynîye hêrişê gerîlayan kena la reyna zî nêeşkena netîceyêke bivisna destî. Çelîkî vat: ''Artêşa tirke bi paştdayîşê NATO, Amerîka û dewletanê bînan 7 mengî yo hêrişan kena. Gerîlayî vera nê hêrişan bi xurtî xo ver danê. Dewleta tirke pê çekanê kîmyewîyan û bombayanê nukleran sûcê şerî kena. Şebneme Korur Fîncanci seba ke waşt ke nê hêrişî bêrê cigêrayene tepişîyaye. No nêzdîbîyayîşê dewkete mojneno ke a şer de teng bîya. Nê prosesî de dewleta mafya-çete-polîsî vera kurdan û elewîyan qirkerdişê fîzîkî û kulturelî de israr kenê.

Dewleta tirke kesê ke vera gerîlayan şer kenê bi vateyê 'eke şima bimire do şehîd bibê' îqna kerdî. Dewlete bi leşkeran peymane daye îmzakerdene.Bi nê hawayî dewlete şarî ra cenazayan zî nimnena. Dima cenazayanê xo zî vêşnena. Huqûqê şerî de cayê ney çin o. Dewleta tirke cara cenazayanê kurdan rê tewr hûrmet nêkena. Hînî dewleta tirke erjanê Îslamî zî peygoş kena. Nêbeno ke merdim nê zulmkaran rê çîyêkî bipawo. Nameyê şar û bawerîyanê Mezopotamya ganî vera barbarîye ma mesuldarîyanê xo bîyarê ca.''

Pîr Riza Yagmurî zî dîyar kerd ke artêşa tirke bi serran o vera gerîlayan sûcê şerî kena û vat: ''Sîstemê dewleta tirke sîstemê Muavîye û Yezîtî yo. Nika artêşa tirke kurdan rê zulmê Yezîtî kena û ewladanê şarê kurdî qetil kena. Şuxilnayîşê çeka kîmyewîye û gazê kîmyewî sûc o. Vêşnayîşê cenazayan zî sûc o. Vera nê sûcan ganî şarê mezlûmî pîya têbigêrê.''