Hakîmîya Cezaya Sulhe ya Bursa Avûkatanê Buroyê Huqûqî yê Bindestan ra Sezîne Uçar rê qedexe kerd ke a avûkatîya Dîleke Arsu, Seda Baykan û Mehmet Mustafa Uzkarî bikera. Hakîmîye sey sebebê qedexeyî zî dewayê bînî yê Uçare mojnayî.

Avûkate Sezîne Uçar derheqê qedexeyî de ANFyî rê qisey kerd.

Sezîne Uçar da zanayene ke seba ke a tewrê cenazaya muwekîlê xo yê verênî bîya û roniştişê dewaya Qirkerdişê Garî protesto kerdo mehkeme ci rê qedexe nayo ro. Uçare vat: ''Nînan ra vera mi û xeylêk avûkatan dewa amebî akerdene. Nê dewayan ra heqê min ê avûkatîye ame qedexekerdene. La a raşte seba ke mi îşkenceyê vera muwekîlanê xo vet werte na bire dîyaye. Mehkeme kena ke îşkenceyî binimna, verê zîyaretanê min ê zîndanan bigêra. Na bire têna do qereqol de zî vera mi bêra caardene. Na bire vana ke ez nêeşkena kesanê ke bi îdîaya 'endamî-propagandaya rêxistine' yenê destbendkerdene rê avûkatîye bikera.''