Hemvervatoxê Komîsyonê Zîndanan ê ÎHDyî Avûkat Yusuf Erdoganî ard ziwan ke tepişteyê nêweşî bi hawayêkê îlegalî tepişîyenê û vat: ‘’Na meseleya ke nêna taloqkerdene, ganî bêra çareserkerdene.’’
Hemvervatoxê Komîsyonê Zîndanan ê ÎHDyî Avûkat Yusuf Erdoganî derheqê rewşa tepişteyanê nêweşan de ajansê ma rê qisey kerd.
Erdoganî pare kerd ke wextê prosesê çareserîye yê 2013-2015î de rewşa tepişteyanê nêweşan rojdem de bibi. Erdoganî îfade kerd ke rewşa psîkolojîke û fîzîkî ya zîndanan goreyê tepişteyanê nêweşan nîya û vat: ‘’Dima ke zîndanê bi Tîpê Fyî ronîyayê Tirkîya de rejîmê zîndanan bi temamî vurîya. Zîndanî qerebalix ê û awanîya înan bena sebebê nêweşîyan. Tepişteyî odayanê qijan de tepişîyenê.
Girewtişê heqê xizmetê weşîye seba tepişteyanê nêweşan meseleyanê tewr giranan ra yew o. Tepişteyî sewqê revîr û nêweşxaneyan nêbenê, werdo qîm nêdîyeno û nê zî cuya tepişteyanê nêweşan kenê giranêr.’’
Erdoganî dîyar kerd ke Dezgehê Tipê Edlîyî zaf reyî raporê ‘nêbeno ke zîndan de bimano’ yê nêweşxaneyan qîm nêvîneno. Erdoganî vat: ‘’Dezgehê Tipê Edlîyî raporê ‘eşkenê zîndan de bimanê’ dano tepişteyan. Nê raporî benê sebeb ke tepişteyî zîndanan de bimirê. Tepişteyê nêweşî ganî bê şertî vera bidîyê. La Tirkîya de tepişteyê nêweşî bi hawayêkê îlegalî tepişîyenê. Na meseleya ke nêna taloqkerdene, ganî bêra çareserkerdene.’’
