17 aşmî yo ke Rayberê Şarê Kurdî Abdullah Ocalan, Hamîlî Yildirim, Omer Hayrî Konar û Veysî Aktaşî ra xebere nîna girewtene. Goreyê xebera Ajansê Mezopotamya avûkatanê Buroyê Huqûqî yê Asrinî muracatê Komîteya Astengkerdişê Îşkenceyî (CPT) kerd.

Muracat de ame vatene ke şertê  "incommunicado''  yo ke yeno manaya bi temamî birnayîşê têkilîye, dewam kenê. Avûkatan vist vîrî ke Îmrali de qedexeyê îşkenceyî bi hewayêkê sîstematîkî yeno binpaykerdene û derheqê qewimîyayîşanê mabênê aşmanaê nîsane-tebaxa 2022yî de zanayîş da. Avûkatan vat: ‘’Nê demî 61 muracatê avûkatan û merdimanê tepişteyan ameyî astengkerdene. Reya muracatê 775 avûkatan o ke 10ê hazirana 2022yî de ame kerdene o zî bêcewab ame verdayene. Hetê bînî ra pêvînayîşê roşanî û telefonî  zî ameyî astengkerdene û aqibetê mektuban zî nîno zanayene.’’

Avûkatan derheqê qedexeyanê pêvînayîşî û cezayanê disîplînî yê neweyan zî zanayîş da. Avûkatana vat: ‘’Hema ke cezaya dîsîplînî ya verêne nêqedîyaya cade cezaya bîne yena dayene. Nê cezayê dîsîplînî avûkatan ra zî yenê nimitene. Muwekîlê ma hetkarîya avûkatan ra mehrum manenê û wina sûc yeno kerdene.’’

Avûkatan CPTyî ra waşt wa Zîndanê Îmraliyî ziyaret bikero û wezîfeyê xo bîyaro ca. Muracat de ame waştene ke komîte wa cade Îmraliyî zîyaret bikero û verê bêhuqûqîyan bigêro. Avûkatan waşt ke wa komîte semedê caardişê pêvînayîşan û astengkerdişê cezayanê dîsîplînî têbigêro. Reyna wa heqê telefon, mektub û faxî bêrê caardene.