Kurdîstan û Tirkîya ra bi seyan avûkatê ke Anqara de ameyî têhet seba ke cewabê muracatê avûkatan ê semedê wedaritişê tecrîdê serê Rayberê Şarê Kurdî Abdullah Ocalanî nêdana Mehkemeya Qanûnê Bingeyî (AYM) protesto kerd. Avûkatê Rayberê Şarê Kurdî, serekê baroyan, wekîlê DEM Partî û Ayla Akat Ata paştî daye çalakîye.

Eşkerayîya hetê Hemserekê Pêroyî yê OHDyî Serhat Çakmakî ra ameywe wendene.  Eşkerayîya ra qismêk wina yo: ''Bi serran o Zîndanê Îmraliyî de hîrê mengan de rayêke cezaya dîsîplînî yena dayene  ke verê pêvînayîşê keyeyan û avûkatan bêro girewtene. Rixmê heme muracatanê avûkatan nê arcaarişî avûkatan ra mîyan yenê kerdene.  Verî bi bahaneyanê sey 'koster xeripyayî ya2 û 'muxalefetê hewayî' pêvînayîşî ameyêne astengkerdene. Nika zî bi qerarê qedexeyê pêvînayîşê avûkatan ê şeş mengan ke bîlasebeb hetê Dozgerîya Înfazî ya Bursa ra yeno girewtene, verê pêvînayîşan yeno girewtene.

Vera caardişê îşkenceyî û binpaykerdişanê heqan mîyanê 9 serran de bi desan reyî Mehkemeya Qanûnê Bingeyî rê muracat ame kerdene la pêro muracatî nînê destgirewtene, wextê înan ravîyereno û yenê bêtesîrkerdene. Mehkemeya Qanûnê Bingeyî derheqê muracatanê vera tecrîdê Îmraliyî de berpirsîyarîya xo nêana ca û domnayîşê bêhuqûqîye de rolê bitesîrî gena xo ser. Ganî Mehkemeya Qanûnê Bingeyî hetê çareserkerdişê probleman de cayê xo bigîro, vera sîstemê tecrîdî yê Îmrlaiyî qeraranê biedaletî bigîro ke meseleyê Tirkîya bêrê çarserkerdene.''

Wekîla DEM Partî Merale Daniş Beştaş zî seba ke derheqê tecrîdê serê Rayberê Şarê Kurdî Abdullah Ocalanî qerar nêgeno AYM şermezar kerd û vat: ''AYM bi talîmatê AKPyî têgêreno. Nê welatî de tecrîd est o. Birêz Abdullah Ocalan binê tecrîdî de yo. 43 mengî yo tira xebere nîna girewtene. Bi mîlyonan kesî vanê ke Abdullah Ocalan îradeyê min o. Eleqeya tecrîdî bi huqûqî çîn a. Tecrîd bi qeraranê sîyasîyan yeno caardene. Abdullah Ocalan hem Tirkîya de hem dinya de  sey rayberê sîyasîyî, sey îradeyê şarê kurdî û şaran yeno muneqeşekerdene. Semedê çareserkerdişê meseleya kurdan rolê ci gird o. Seba ke îqtîdar dişmenê kurdan o, Îmrali de tecrîd est o.''