Hemtemsîlkara DEM Partî ya Almanya Leyla Îmret ard ziwan ke selehîyetdaranê almanan pêvînayîşê înan de, hewteyê vîyarteyî de vato ke ê do paştî bidê prosesî û eke waştiş bibo do çimdarîye zî bikerê.
Hemtemsîlkara DEM Partî ya Almanya Leyla Îmret ard ziwan ke selehîyetdaranê almanan de mîyanê heyetêkî de pêvînayîş kerdibî. Heyet de Hemserekê DEM Partî Tuncer Bakirhan zî est bi. Leyla Îmret derheqê pêvînayîşî de ajansê ma rê qisey kerd.
Leyla da zanayene ke seba ke hukmatê Almanya yê neweyî de têkilîyanê xo xurt bikerê û derheqê prosesê ‘Haştîye û Komelê Demokratîkî’ de agahîyan bidê înan Berlin de xeylê cayî zîyaret kerdî. Leyla vat: ‘’Hukmatê Almanya ra selahîyetdaran pêvînayîşan de pare kerd ke ê paştî danê nê prosesî. Înan vat ke ‘Ma amade yê ke erk û rolanê xo yê seba nê prosesî bîyarê ca û eke waştiş bibo do çimdarîye zî bikerê.’ Xora waştişê ma yo winayên zî est o.
Ancî ma nînan rê pare kerd ke Meclîs de do komîsyonêk bêro awankerdene. Selahîyetdaranê hukmatê Almanya not kerd ke ê do paştî bidê nê komîsyonî zî.’’
Leyla da zanayene ke înan zî dewleta Almanya ra waşt ke wa sîyasetê xo yê vera kurdan bivurna û polîtîkayanê krîmînalîzasyonî ra fek vera bida. Leyla vat: ‘’Selahîyetdarê hukmatê Almanya bi hawayêkê pozîtîfî nêzdîyê nê waştişê ma bîyî.’’
Leyla vist vîrî ke înan Berlin de kombîyayîşê şarî kerdê û derheqê prosesî de cewabî dayê persan. Leyla vat: ‘’Komel azadîya Birêz Ocalanî û vengkerdişê zîndanan wazeno. Komel pabeyê vurîyayîşanê huqûqîyan o. Komel perseno ke qey hema zî vera gerîlayan hêrişî yenê kerdene û Erdogan senî nêzdîyê prosesî beno.’’
