Avûkatanê Rayberê Şarê Kurdî ra muracato lezabez

Avûkatanê Rayberê Şarê Kurdî Abdullah Ocalanî yê ke bi serran o nêeşkenê muwekîlê xo bivînê, semedê pêvînayîşê lezabezî reyna muracatê Serdozgerîya Komare ya Bursa û Mudirîya Zîndanê Îmraliyî kerd.

Avûkatanê Rayberê Şarê Kurdî Abdullah Ocalan, Omer Hayrî Konar, Hamîlî Yildirim û Veysî Aktaşî yê ke Îmrali de binê tecrîdî de yenê tepiştene, Mazlûm Dînç, Îbrahîm Bilmez, Newroze Uysal û Serbay Koklu seba ke muwekîlanê xo reyde pêvînayîş bikerê, reyna muracatê Serdozgerîya Komare ya Bursa û Mudirîya Zîndanê Îmraliyî kerd.

Avûkatan tewr peynî 8 serran da dima 2-22ê gulane, 12-18ê hezîrane û 7ê tebaxa 2019î de muwekîlê xo reyde pêvînayîş kerdbi. Cewab nêdîyeno muracatê pêvînayîşan.

Avûkatanê Buroyê Asrinî 22ê teşrîna peyênê de seba ke cade muwekîlanê xo Rayberê Şarê Kurdî Ocalanî û tepişteyanê bînan ê Îmraliyî Omer Hayrî Konar, Hamîlî Yildirim û Veysî Aktaşî pêvînayîş bikerê muracatê Dadgerîya Înfazî ya Bursa kerd.

Muracatê avûkatan ame redkerdene û ame vatene ke derheqê Abdullah Ocalanî de di qerarê qedexeyê pêvînayîşî estê. Dadgerîya Înfazî ya Bursa vat 12ê teşrîna verêne de cezaya dîsîplînî ya 6 mengan dîyaya Abdullah Ocalanî coka nêeşkeno pêvînayîş bikero. Dadgerîye cewabê muracatê keyeyî de zî vat Serekîya Heyetê Dîsîplînî ya Mudirîya Dezgehê Ceza Înfazî yê Îmraliyî 18ê tebaxe de cezaya pêvînayîşê merdiman a 3 mengan daya. Dadgerîye vat seba ke cezaya qedexeyê pêvînayîşî yê 6 mengan seba avûkatan û 3 mengan zî seba merdimanê tepişteyan esta ê muracatê pêvînayîşî red kenê.