Avûkatanê Buroyê Huqûqî yê Asrinî 2022 de vera tecrîdîkerdişê Rayberê Şarê Kurdî Abdullah Ocalanî û hîrê muwekîlanê xo yê bînan muracatê Komîteya Heqanê Merdiman a Neteweyanê Yewbîyayeyan (NY) kerdbi. NYyî nê warî de Tirkîya rê tedbîr waşt û la Tirkîya waştiş nêard ca û cewabê xo de NYyî rê nuşt ke ê argumananê seba tedbîrî nêhesibnenê. Avûkatê Rayberê Şarê Kurdî xo amade kenê ke vera cewabê Tirkîya cewabêkî bidê. Avûkatanê Buroyê Huqûqî yê Asrinî ra Îbrahîm Bîlmezî derheqê babete de ANFyî rê qisey kerd.

Bilmezî da zanayene ke ê nêeşkenê muwekîlanê xo yê Îmraliyî ra xeberêke bigêrê û vat: ''Ma 1999 ra nata babete benê Konseya Ewropa la ma netîce nêgênê. Coka ma muracatê Komîteya Heqanê Merdiman a NYyî kerd. Na komîte sey Mehkemeya Heqanê Merdiman mehkemeyêka mîyanneteweyî ya. 29ê temmuza 2022yî de ma muracatê Komîteya Heqanê Merdiman kerd. Ma reyna bi waştişê tedbîrî muracat kerd. Ma vat ke 25ê adara 2021î ra nata Birêz Ocalan û muwekîlanê xo yê bînan ra xebere nêgênê. 

Komîte 6ê êlula 2022yî de derheqê babete de waştişê tedbîrî kerd û Tirkîya rê nuşt, vat 'Verê avûkatan ra astengîye wedare ke wa muwekîlanê xo bivînê.' La Tirkîya no nêard ca. Naye ser o ma agahdarîyêke kerde. Ma vat ke Tirkîya çîyo hewce nêkerdo. Çeleyê 2023yî de Komîteya Heqanê Merdiman reyna bira tedbîrî viste vîrê hukmatê Tirkîya. Ma na bire ra dima hem muracatê mehkemeya înfazî kerd hem zî waştişê tedbîrî pêşkêşê Mehkemeya Makezagonî kerd. La nê meqaman zî çîyêk nêkerd.''

Avûkat Bîlmezî sey netîce vat ke proses berdewam o û ê do cewabê pêşkêşîya NYyî ya Tirkîya bidê. Bîlmezî vat: ''Hukmato nikayên fikrê xo şawitî Neteweyanê Yewbîyayeyan rê. La hukmatî fikranê xo de qala waştişê ma yê tedbîrî û bira tewirê vera NYyî nêkerda. Heta nê kerdişî nêhesibnayî. Dima ke înan cewabê xo şawit komîte do derheqê esasan de birêke bida. La komîte çend do xo ver bida ma nêzanenê.''