Komeleya Huqûqnasan a Seba Azadîye (OHD) derheqê serebûtan û xîretê xokiştişê komkîyî de Zîndanê Sîlîvrî zîyaret kerdbi û raporêk weşanabi. Avûkate Rêzane Gezera ke heyetê zîyaretî de ca girewtêne derheqê babete de ANFyî rê qisey kerd.

Rêzane Gezer îfade kerd ke vera tepişteyanê edlîyan tedayêka pîle est a. Gezere vat: ''Tepişteyo ke ma tede qisey kerd, vat rewşa înan  zîndan de xirab a. 6ê nîsane de gardîyanî erzenê koxûşan ser û danê tepişteyan ro. Tepişteyêkî keyeyê xo rê qala ney kerdo û her çi naye ra dima dest pêkerdo. Gardîyanan zî nê tepişteyî rê îşkence kerd û waşt tepişte vajo ke ey zûre kerda. Ma bi zelalî nêzanenê ke zîndan de çi qewimîyayo. La mudirê zîndanî zî tepişteyan rê gef wendo. Îşkenceyê gardîyanan ra dima tepişteyan bi komkî xîret kerd ke xo bikişê.

Çîyo balkêş no yo ke tepişteyê ke xîret kerd ke xo bikişê vanê ê Ferhan Yilmaz nêşinasnenê. Îdareyê zîndanî seba mergê Yilmazî vatbi krîzê qelbî la eşkera bîyo ke o pê îşkenceyî merdo. Hayîya tepişteyan çin a ke Yilmaz pê îşkenceyî merdo. No zî eşkera keno ke her koxûşî de îşkence est o û serebûtê winasênî qewimîyenê. Halîl Hasano ke xîret kerd xo bikişo tede cara nê meylê xo kiştişî est bi û ey wextê îşkenceyî de gardîyanan rê no vato.''

Gezere da zanayene ke înan tena 7 tepişteyan de pêvînayîş kerdo û nê 7 tepişteyî zî ameyî sewqkerdene. Gezere vat: ''Seba ke no serebût medya de zaf rojdem bi, tepişteyî ameyî sewqkerdene. La tepişteyî zî xo wazenê ke Sîlîvrî ra şorê. Vera tepişteyanê edlîyan zî her zîndanî de tedayî zêdîyayî. Çîyo ke nêeşkîyenê vera tepişteyanê sîyasîyan bêro kerdene, bi rehetî edlîyan rê yeno kerdene. Tepişteyê edlîyî teyna yenê verdayene. ''