Endamê Konseya Raybedişî ya KCKyî Zubeyîr Aydarî derheqê rayraşîyayîş û mîtîngê Dusseldorfî yê 25ê hezîrane, hêrişanê dewleta tirke ya îşxalkere, tecrîdê Îmraliyî de ANFyî rê qisey kerd.

Zubeyîr Aydarî ard ziwan ke dewleta tirke her ca de hêriş kena û vat: ''Şuxilnayîşê çeka kîmyewîye reyde dewleta tirke Rojawanî rê gefê îşxalî wanena. Vakurê Kurdîstanî de zî her roje bi desan merdimî tepişîyenê û înan rê îşkence yeno kerdene. Rayberê Şarê Kurdî Ocalan binê tecrîdî de yo û 15 mengî yo tira xebere nêna girewtene. Pêro zîndanan ser o tedayêka pîle est a.  Şarê ma her aste de vera tecrîdî nêrazîbîyayîşê xo mojneno.''

Aydarî bale ante ser ke 775 avûkatan seba şîyayîşê Îmraliyî muracat kerdo û da zanayene ke no vera tecrîdî xîretêko girîng o. Aydarî îfade kerd ke çalakîyê Gemlîkî û verê OPCWyî zî seba ke bala rayaumûmîye ancenê zaf bitesîr ê.

Aydarî vist vîrî ke 25ê hezîrane de serkêşîya Înîsîyatîfê Haştîye yê Defend Kurdistanî de,  Dusseldorf de rayraşîyayîş û mîtîngêk do bêrê kerdene. Aydarî vat: ''Na çalakîya ma ya Dusseldorfî ganî biba asta tewr berze ya pêro çalakîyan. Ez venga pêro kurdîstanijan û dostanê ma dana ke 25ê hezîrane de Dusseldorf de bibê.''