20ê hezîrane de qezaya Kanîreşî ya Çewlîgî de bi şîdetê 5.7î erd lerzabi û erdlerzî bi giranî tesîrê hemwelatîyan kerdbi.Wekîlê HDPyî yê Çewlîgî Erdal Aydemîrî Meclîs de qisey kerd û da zanayene ke mexdûrê erdlerzê Kanîreşî hema zî pê meseleyanê erdlerzî bilîyenê.

Aydemîrî eşkera kerd ke bi taybetî dewanê Kanîreş û Çerme de zaf keye, axûrî ijîyayî û heywanî telef bîyî. Aydemîrî eşkera kerd ey 10 rojî verê cû nê dewî zîyaret kerdî û dî ke pêro meseleyê mexdûranê erdlerzî hema zî dewam kenê.

Aydemîrî vat: ''Dewijî wazenê ke wa axûrê înan bivirazîyê. Dewijan tay meseleyî zî pê îmkananê xo çareser kerdî. La ganî meseleyê nikayênî cade bêrê çareserkerdene. Erdlerzê Kanîreşî de selahîyetdar û wezîranê dewlete uca pê teyarayan zîyaret kerdbi. Herinda ke ê pê teyarayan biameyêne pereyê mazotê teyarayan bidîyêne hemwelatîyan pêro meseleyê înan qedîyayêne. Zimistan dîya. Şert û mercê cuya mexdûranê erdlerzî bîyî giranêr. Eke vewre bivara pêro heywanî teber de do telef bibê.''