Wekîlê HDPyî yê Çewlîgî Erdal Aydemîr pê dovîzê ‘‘tecrîd sûcê merdimîye yo’’ vejîya kursîyê Meclîsî ser. Wekîlê Şirnexî Huseyîn Kaçmazî zî vat: ‘‘Tirkîya de îşkenceyo sîstematîk est o û merkezê ci Îmrali yo. ’’
Wekîlê Partîya Demokratîke ya Şaran (HDP) yê Çewlîgî Erdal Aydemîr Heyetê Pêroyî yê Meclîs de butçeyê Wezîrîya Edaletî yê 2023yî de bale ante tecrîdê Îmraliyî ser.
Erdal Aydemîro pê dovîzê ‘‘tecrîd sûcê merdimîye yo’’ û “CPT wezîfeyê xo bikerê “ vejîya kursîyê Meclîsî ser, madeyê 59, 62, 66, 67, 68 û 83yî yê Qanûnê Îfazê Ceza nîşan dayî û veng kerd Wezîrîya Edaletî û CPTyî. Aydemîrî vat: “Wa şertê Zîndanê Îmraliyî bêrê cipersayene û goreyê huqûqî rayapêroyîye dir bêrê parekerdene. Ma fînenê vîrî ke no yew heq o. Ma wazenê ke şima berpirsîyarîya xo ya derheqê Zîndanê Îmraliyî bîyarê ca.”
Wekîlê HDPyî yê Şernexî Huseyîn Kaçmazî zî derheqê astengkerdişê tehlîyerkdişê tepişteyan de qisey kerd û bale ante tecrîdî ser. Kaçmazî vist vîrî ke tepişte Çetîn Arkadaşî seba ke vato “Birêz Ocalan” înfazê ci ameyo vêşnayene û vat: "Tirkîya de îşkenceyo sîstematîk est o û merkezê ci Îmrali yo. Tecrîd beno sebebê çaresernêkerdişê meseleya kurdan, dewrkewtişê polîtîkayanê şer û pêkewtişan, binpaykerdişê huqûqî û butçeyê şarî semedê şerî yeno şuxulnayene."
