Komîsyonê Amadekarîye yê Komîsyonê Qanûnê Bingeyî û Edaletî yê Meclîsî seba wedaritişê heqê destpanêdayîşê Hemsereka Pêroyî ya DBPyî Salîha Aydenîz ame pêser. Wekîlê HDPyî Abdullah Koç, Wekîlê CHPyî Rafet Zeybek û Wekîlê AKPyî Alî Ozkaya, Emîne Zeybek û Orhan Kircali tewrê kombîyayîşî bîyî.

Serekê komîsyonî Wekîlê AKPyî Alî Ozkaya, katîbê ci zî Wekîla AKPyî Emîne Ozkaya ya.

Wekîlê HDPyî Abdullah Koçî kombîyayîş de ard ziwan ke wedarnayîşê heqê destpanêdayîşî qanûnî nîyo û vat: ''Ma seba ke heqê xo yê demokratîkî şuxilnenê, bi fermanê Wezîrê Karanê Zereyî Suleyman Soyluyî gêrîyenê binê ablûqa. Hêzê asayîşî dormeyê ma gênê û azadîya ma asteng kenê. Meseleya kurdan pê wedarnayîşê heqê destpanêdayîşî nêqedîyena. Eke wekîlêka ke bi mîlyonan rayan ameya weçînayene bêra muhakemekerdene, no do mîyanê şaran de cîyabîyayîş xorin bikero.''

Koçî waşt ke heqê destpanêdayîşî yê Aydenîze nêro wedaritene la waştişê ci ame redkerdene. 

Komîsyonî heta 4ê temmuze saete 12.00 seba pawitişê nuştekîyî û heta 5ê temmuze zî seba pawitişê fekkîyî wext da Aydenîze. 

Pawitişê Aydenîze ra dima komîsyon do newe ra bêro pêser û raporê xo pêşkeşê Komîsyonê Karma bikero.