Hemsereka Pêroyî ya DEM Partî Tulaye Hatimogullari vat babeta esasî ya pêvînayîşê Heyetê Îmraliyî û Wezîrîya Edaletî a ya ke semedê demokratîkbîyayîşî game ke hewce kenê bêrê eştene.
Hemsereka Pêroyî ya DEM Partî Tulaye Hatimogullari kombîyayîşê grûba partîya xo de rojdem erjna.
Hatimogullari nê vatî: ''Vengdayîşê Rayber Apoyî di aşmî xo dima verdayî la hema zî ma goreyê vengdayîşê ci gamêke û îradeyêk nêdî. Komel vano ke îqtîdar qey game nêerzeno? No proses qey yewhet aver şino? Ma zî tîya ra persenê: Tecrîd dewam keno, qet gamêka pêt nêameya eştene, her roje caardişê antîdemokratîkî kewnê dewre, qeyûmî dewam kenê. Ma nika senî cewab bidê hemwelatîyan? Gerek Birêz Ocalan bibo serbest ke bieşko bixebito û meclîs semedê bedilnayîşê demokratîkî wezîfeyê xo bîyaro ca. Haştîye meseleya hempare ya pêro Tirkîya ya. Se beno wa bibo haştîye û çareserî cameverdê.''
Tulaye Hatimogullari badê kombîyayîşê grûba partî ya meclîsî cewab da persanê rojnamegeran. Tulaye Hatimogullari cewab da îdîaya PKK do aşma gulane de kongreya xo bikero.
Tulaye Hatimogullari wina vat: ''Derheqê kongreya xo feskerdişî ya PKKyî de zanayîş destê ma de çîn o. La yeno pawitene ke eke tay game qanûnî, gamê pêtî bêrê eştene beno ke çîyo winayên bibo. Eke wird hetî zî gamê hewece kenê vera yewbînan bierzê yeno pawitene ke kongreya fesîhî bêro kerdene. Teberê nê de derheqê tarîxî de zanayîşêk çîn o.''
Derheqê pêvînayîşê Wezîrê Edaletî Yilmaz Tunç û Heyetê Îmraliyî yê DEM Partî de zî persêk ame persayene.
Tulaye Hatimogullari nê vatî: ''Pêvînayîşê bi Wezîrîya Edaletî de do xeylê babetî bêrê qiseykerdene. Heqê hêvî, qanûnê înfazî…Babeta esasî ya pêvînayîşî a ya ke Tirkîya de semedê demokratîkbîyayîşî gamê ke hewce kenê bêrê eştene. Muhîm o ke semedê tepişteyanê nêweşan û tepişteyê ke înfazê înan bi hewayêkê keyfî ameyî veşnayene, gamê pêtî bêrê eştene. Xora eke goreyê qanûnê bingeyî bêro têgêrayene nê yenê caardene. Nê babetî zî do bi detayan bêrê qiseykerdene.''
