Şubeyê Wanî yê Komeleya Heqanê Merdiman (ÎHD) derheqê hêrişanê vera goranê gerîlayan de kombîyayîşê çapemenîye kerd. MEBYA-DER zî tewrê kombîyayîşî bi.

Hemserekê ÎHDyî yê Wanî Mehmet Karataşî pare kerd ke gorê kurdan zî raştê hêrişan yenê û vat: ''Nê hêrişî sûcê vera merdimatîye yê.''

Fadil Bariştirano ke babîyê gerîlaya YJA-Starî ya şehîde Revane Zana Bariştiran (Omedya Rohat) o û gorê kênaya ci zî raştê hêrişî ameyo, kombîyayîş de qisey kerd û vat: ''Kênaya mi 2016 de Dêrsim de hêrişê hewayî de şehîd bîye. 27ê teşrîna verêne ya 2022yî de TEMî venga mi da ke ez îfade bida û înan mi rê vat 'To nameyo ke rêxistine dîyar kerdo nuşto.' 29ê teşrîna verêne de polîsan gor texrîb kerd, kerraya gorî şiknaye. No merdimîye de yan zî huqûq de çib o. No kerdiş bi taybetî vera kurdan yeno kerdene. La ma do wayîrê cenazayan û bedenanê weşan ê domananê xo vejîyê. Ma do meverdê çew têkoşînê înan binpay bikero.Ma vera na bêhuqûqîye muracatê her cayî bikerê. ''

Hemsereka MEBYA-DERî Hanime Kaya zî da zanayene ke hêrişê vera goran zêdîyenê,  derheqê texrîbatanê goran de hîrê kesan muracatê înan kerdo û keyeyî yenê tehdîtkerdene.