Hakan Arslano ke wextê qedexeyê tebervejîyayîşî yê Sûrê Amedî de 2ê kanûna 2015î de şehîd bibi esteyê ci 7 serran ra dima hetê Dozgerîya Komare ya Amedî ra  zereyê yew tewreyî de dîyabî babîyê ci. Fotografo ke tede babî Arslan verarê ci de pê tewreyî Edlîyeya Amedî ra vejîyeno bi sebebê nêrazîbîyayîşan.

Babî Alî Riza Arslan ANFyî rê qala ci kerde ke 6 serran senî xîret kerd ke cenaza bigêro û wexto ke cenaza girewtbî çi hîs kerdo.

Keyeyê Arslanî yo ke 9 kesan ra yeno pê, dewa Çavuşkoyî ya qezaya Qereyazî ya Erziromî de ciwîyeno û keyeyêko welatperwer o. Babî Alî Riza Arslano ke Hakan Arslan zî tede 7 domanê ci est ê, ard ziwan ke Hakan domanîya xo ra nata tim kesêko rêzdar û wayîrferaset bîyo.

Babî Arslanî da zanayene ke Hakanî dewe de hetkarîya ey kerdêne la hamnanê 2015î de ey vat ke wazeno şoro Îstanbul de kekanê xo reyde bixebito, înan zî verê ey nêgirewto.

Babî Arslanî wina dewam kerd: ''O karê tekstîlî de xebitîyayêne. Mi waştêne ey bida zewijnayene. Dadîya ci ey rê telefon de qala zewajî kerde, ey zî vato 'Wextnê dima.' Nê qiseykerdişî ra dima 8 rojan ma nêeşkayî xo biresnê ey. 7 mengan û 20 rojan ra dima televîzyon de xeberan de ma dî ke o Sûr de şehîd bîyo. Xora na xebere ra çend rojî verî mi tim çîyêko xirab hîs kerdêne. Mi dewe de embazanê xo rê vat ke 'Ez wina hîs kena ke çîyêk ameyo sereyê lajê mi' û xora şan zî mi a xebere dîye.

Ez cade kewta rayîr şîya Amed. Uca de zî mi eşnawit ke lajê mi şehîd bîyo. Embazêkê ey ez dormeyê Sûrî de çarnaya, mi rêçê linga Hakanî hîs kerdêne. 6 serran mi kerd ke cenazaya lajê xo bigêra. Rayêk zî seba ke çimê mi bitersnê înan ez 10 rojan tepişta. Nê 6 serrî mi rê bîyê zindan. Tim çimê mi rayîr de, goşê mi telefon de bi. Heta sibata 2021î ez pê hêvîya 'ewro do agahî bêra' ciwîyaya. Sibata 2021î de dewlete mi rê telefon kerd ke cenaza Sûrî ra ameya vetene.  Dima ke cenaza ameye vetene ez û cinîya mi ma 3 mengan seba testê DNA gonîye daye. Netîceya testî ra dima cenaza erşawîyaye Dezgehê Tipê Edlîyî yê Îstanbulî. 9 mengan uca de mende. 25ê tebaxe de avûkatî telefon kerd û vat ma eşkenê cenaza bigêrê. Ma amadekarîyê xo kerdî û dişeme kewtî rayîr.

Mi vatêne qey ez cenaza Dezgehê Tipê Edlîyî ra gêna. Ma vatêne qey ma seba karanê fermîyan şinê edlîye. Çunke înan nêvat ke uca de cenaza do bidê ma. Dima înan cenaza arde, tewre akerd, tira CDyêk vet û tewre da mi. Wextoo ke mi esteyî dîyî, zaf dejaya. Mi înan rê vat ke 'şima cenaza wina danê mi?' Înan vat Dezgehê Tipê Edlîyî ra wina ameyo, ê zî wina danê. Mi fekê tewreyî girê da, vist verarê xo û vejîyaya teberî. Çew nêeşkayêne nê halî de îdare bikero la Homayî îrade da mi û mi îdare kerd. Zor û zehmetîyê ke 6 serran mi antê kişte de, a roja ke mi cenaza girewta kiştêke de.

Kam bibo na rewşe ra şermî keno. Wexto ke ez ameya keyeyî mi fotografê xo yê verdê edlîye dî o çax seke ez merda. Wexto ke ez ê fotografî vînena hêrs bena, aciz bena. Wexto ke ez edlîye ra vejîyaya mi esteyî kerdî wesayîtî û veng da ambulansî. Rayîr de cayêkê musaîdî de mi esteyî kerdî tabutî. Dewe de ma cenaza defin kerde. Yewinanê cendirmeyan ê Amed, Erzirom û Qereyazî ez teqîb kerdêne. Bi taybetî îstîxbaratê cendirmeyan şîyayîş û ameyîşê mi kontrol kerdêne. Înan nêverda ke keyeyê şînî de ma şîn ronê. Înan vat 'Verê keyeyê xo de şîn ronê.' Înan waştêne ke girse nêzêdîyo. ''