Zîndananê Vakurê Kurdîstanî û Tirkîya de 618 tepişteyê nêweşê ke rewşa înan giran a est ê. Bado ke sîyasetmedara kurde Aysele Tugluk seba ke nêweşa giranbî ameye veradayene rewşa tepişteyanê nêweşan reyna kewt rojdem. Hemsereka TUHAY-DERî yê Wanî Edîbe Babur derheqê babete de ANFyî rê qisey kerd.

Edîbe Babur vat: ''Veradayîşê Aysele Tugluk zaf erey bo zî ma pê keyfweş bîyî. La no qîm nêkeno. Hema bi seyan tepişteyê nêweşê ke rewşa înan sey Tugluke ya est ê. No qeraro emsal o. Ganî heme tepişteyê nêweşî bêrê veradayene ke teber de cayanê taybetan de bêrê tedawîkerdene. Nê nêweşî raşta zî helanê xo yê peyênan de yenê veradayene. Nimûneyê winayên zaf ê. Tay embazê ma bado ke yenê veradayene dinyaya xo bedilnenê. Ganî her kes mîyanê huqûqî de biciwîyo û heme embazê nêweşî cade bêrê veradayene. Zîndanan de 618 tepişteyê nêweşê ke rewşa înan giran a est ê. Nêweşê demansî zî zaf ê.  Vengê tepişteyanê nêweşan nîno eşnawitene.  Ganî ma vera înan dahîna hîsgêr bê. Xora heme zîndanan de îşkence est o.  Tepişteyê ke raştê neheqîye yenê û wayîrê heqanê xo vejîyenê raştê şîdetî yenê û hucreyan de yenê tepiştene. Zîndananê Wanî de werd zî sînordar yeno dayene.''