Hemserekê Pêroyî yê DEM Partî Tuncer Bakirhanî vera xespî hêrsê xo ard ziwan û vat: ''Îqtîdar wa hinî nê zîhnîyetî caverdo. Şima pancas reyî zî qeyûm tayîn bikerî, no şar şima tîya nêverdeno, şima nêvîjneno, şima sey îradeyê xo nêvîneno.''
Hemserekê Pêroyî yê DEM Partî Tuncer Bakirhanî derheqê munaqeşeyanê peyênan ê derheqê meseleya kurdan û qeyûman de ANFyî rê qisey kerd.
Tuncer Bakirhanî nê vatî: ''Raya verên a ke semedê çareserîya meseleya kurdan firseto tarîxî est o. Birêz Ocalan keno ke pencreya tarîxî abikero. Tam prosesê winayênî de ganî îqtîdar dahîna zaf qala haştîye bikero la herinda nê de şaredarîyanê ma de qeyûm ca kerd. No zî mojneno ke no îqtîdar senî bêsamîmîyet o. Hema rayapêroyîya Tirkîya tam fam nêkerd. Raşta haştîye wazenê ya nê? Raşta zî famkerdiş zehmet o.''
Bakirhanî bale ante pêvînayîşanê bi Rayber Apoyî ser û wina vat: ''Nika xeylê welatê dinya wazenê ke wa meseleya kurdan bêro çareserkerdene û Rojawan bibo wayîrê statuyî. Raya verên a ke rayapêroyîya netweyî û mîyanneteweyî wazena na meseleya bi rayîranê demokratîkan bêro çareserkerdene. Raya verên a şarê Tirkîya wina pabeyê vengdayîşê Birêz Ocalanî yo. Ma bi aqilî ke rî bi rî yê ke wazeno verê haştîya komelkî bigîro. No aqil rayîro xeletî ra şino. No rayîr, rayîr nîyo. No rayîr Tirkîya reyna fîneno mîyanê kaosî.
Birêz Ocalan bi heme samîmîyetê xo, bi heme nîyetê xo yê holî, bi hîsanê xo yê şorişgêrî wazeno wa hinî zemînê pêkewtişî ra ravêrîyo zemînê sîyasîyî. Birêz Ocalan semedê nê keda pîle dano. Ma 41 merkezanê girdan de kombîyayîş kerdî. Her ca de waştiş est o, hêvî est a. Şar vengdayîşê Birêz Ocalanî muhîm vîneno. Coka ma zî veng danê îqtîdarî ke wa goş bido şarî û dişmenîya vera kurdan caverdo. Coka ma Wan de yê.
Şarê Wanî yo bianorî ke pêro 14 cayê Wanî girewtî bi rojan o vera qeyûmî xover dano û wayîrê îradeyê xo vejîyeno. Çar hetanê Tirkîya ra polîsî kiriştî merkezê Wanî. Hema hema pêro koşeyê Wanî ameyî girewtene. Îşkenceyo giran est o. Vera parlemanteran, hemşaredaran, îdarekaranê ma, şarê ma, doman, ciwan û cinîyan hêrişo giran est o. Bi nê şîdetî, bizorî kenê ke merdiman bêveng bikerê.
Îqtîdar wa hinî nê zîhnîyetî caverdo. Şima pancas reyî zî qeyûm tayîn bikerî, no şar şima tîya nêverdeno, şima nêvîjneno, şima sey îradeyê xo nêvîneno. Wan zaf hol zano kam cayê kurdan de yo kam vera kurdan o. Coka ez veng dana îqîtdarî ke wa pencraya firsetî ke Birêz Ocalanî akerde raşt bierjno û na mesele bi muzakeran çareser bikero. Yewna rayîr çîn o.''
