Meclîsê Partîye (PM) yê DEM Partî seba ercnayîşanê netîceya weçînayîşan û dîyarkerdişê xerîtaya dewrê neweyî Anqara de bînaya merkezîye de kombîyayîşî keno. Kombîyayîş do di rojan dewam bikero.

Hemserekê Pêroyî yê DEM Partî Tuncer Bakirhanî kombîyayîş de qisey kerd û îfade kerd ke netîceya weçînayîşan seba her kesî bîya hêvîyêke. Bakirhanî vat: ''Şarê kurdî 31ê adare de wayîrê îradeyê xo vejîya û qeyûmî şawitî. Rojawanê welatî de zî stratejîya ma ser kewte. DEM Partî Tirkîya de netîceyê weçînayîşan û rotaya ameyoxî dîyar kerdî. Îqtîdarî bi dek û dolaban îradeyê Şirnex, Bedlîs û Qersî xesp kerd. La ma do nê cayan de zî îradeyê xo apey bigêrê.

Ma do xebatanê hîna xurtan bikerê, hîna zaf xo rêxistin bikerê û pêro dizdan bişawê. Ma kêmasî û xeletîyê xo zî tesbît kerdî. Ma seba fîrazkerdişê serkewtişê xo ney seba raştkerdişê kêmasî û xelatîyanê xo nê kombîyayîşan kenê. Ma tradîsyonêkê winayênî ra yenê ke do seba raştkerdişî xebatanê xurtan bikerê.''