Komeleya Paştayîşê Keyeyanê Tepişteyan û Hukmwerdeyan Marmara  (MA-TUHAYDER)  bi çalakîyêke bale ante rewşa tepişteyanê nêweşan ser. Çalakîya ke binê ablûqaya polîsan de ameye kerdene Mayê Haştîye, Wekîla HDPyî ya Îstanbulî Zuleyha Gulum, Hemsereka HDPyî ya Îstanbulî Îlknur Bîrol  û xeylêk kesî tewrê ci bîyî.

Eşkerayîye de verî Îlknure Bîrol qisey kerd. Bîrole tepişteyê nêweşî sey darba giranê ya Tirkîya name kerd û vat: ''Tepişteyê nêweşî herinda tedawîkerdişî de mergî rê ameyî caverdayenê. Ganî no îşkence cade biqedîyo. Vera tepişteyan huqûqê dişmenî yeno caardene ke ganî no tewir cade bêro bedilnayene.''

Zuleyha Gulum zî zîndanê sey keyeyê cenazayan name kerdî û vat: ''Tepişteyanê nêwşan ra qesas yeno girewtene. Tecrîdê zîndanan eslê xo de vera komelî yeno kerdene. Ganî ma pêro pîya vera şehdatanê zîndanî vengê xo berz bikerê û vajê hinî bes o.''

Hemsereka  MA-TUAYDER  Esîne Çelîk zî vat: ''Zîndanî pê zext îşkenceyan açarîyayî keyeyanê mergî. Hewteyêk de zîndanan ra çar xeberê mergî ameyî. Garîbe Gezer, Abdulrezzak Şuyur, Halil Guneş, û Salih Togrul nêtîceya sîstemê înfazî de dinyaya xo bedilnaye. Zîndanan de heqê tepişteyan yenê binpaykerdene û caardişê kewyfîyî qewimîyenê. Astengkerdişê tedawîya nêweşan eşkera îşkenceyo sîstematîk o. Her roje xeberê mergî yenê la şar bêveng o. Ganî komel wayîrê tepişteyan vejîyo. Hukmat nêeşkeno vera nê mergan goşan bicino xo rê û bêveng bimano ganî cade semedê vindarnayîşê îşkenceyî û çareserkerdişê rewşa tepişeyanê nêweşan cade çîyêk bikero.Zîndanî wa mebê keyeyê mergî''