Endama Heyetê Rayraberdişî yê Baroyê Amedî Cemile Turhali Balsaka ke ANFyî rê qisey kerd ard ziwan ke huqûqo ke semedê rehetkerdişê cuye yo, inkey sey çuyeyê îqtîdarî yeno şuxulnayene.

Cemile Turhali Balsak vat: “Dewlete berpirsîyar a ke heqanê bingeyênan ê şarî bipawo. No semedê hemwelatyan zî yew heq o, la roja ma de huqûq herinda pawitişê merimî de ey dahîna zaf fîneno tengayî. Huqûq inkey sey çuyeyê îqtîdarî yeno şuxulnayene. Merdim mîyanê sîstemî de binê zextî de yeno helnayene. Dewlete tim hêrişê heq û azadîyeyan kena. Komel yewbînî ra yeno cîyakerdene. Qanûne bingeyî têna qale de est o. No tewr zaf cografyaya kurdan de binpaykerdişê heqan de yeno vînayene. Heqê bingeyî cografyaya kurdan sey rayîrê cezakerdişî yê. Qanûne bingeyî bi xo açarîyayo rayîrê cezakerdişî. Coka hemwelatî xo azad hîs nêkeno. Vîneno ke îqtîdar heq û azadîyanê c yê bingeyî nêgeno binê temînatî. Têna îqtîdar nê yew muxaletê xurtî zî nêvîneno. Coka şar mecbûr maneno ke welatî ra vejîyo. Dewlete pê polîtîkaya hêrişkare komelî ser o tesîr kena. Ekonomî û sîyaset zî binê tesîrê ci de manenê. Cayo ke tede azadîye çînêbo xora refahê ekonomo zî çîn o. Krizê îqtîdar tesîrê krîzê ekonomîk û polîtîkî zî kena. Şar seba ke bêhevî yo verê xo dano teberê welatî.”