Vervatoxa Meclîsê Cinîyan ê HDPyî û Wekîla Êlihî Ayşe Acar Başaran derheqê hêrişanê vera kurdan, tecrîdê vera Rayberê Şarê Kurdî Abdullah Ocalanî, armancê deklarasyonî û krîzê ekonomî de ANFyî rê qisey kerd.

Ayşe Acar Başaran hêrişê dewleta tirke yê vera HDPyî û kurdan vistî vîrî û vat: ''Her parçeyê Kurdîstanî de dewleta tirke û hemkarê ci hêrişê ma û kurdan kenê. 15ê nîsana 2015î ra nata dewleta tirke vera kurdan şerêkê topyekûnî kena. Wextê prosesê çareserîye de tay zî bo semedê çareserîye tay gamî ameybî eştene la no zî hetê dewleta tirke ra ame xerakerdene. Ewro Vakurê Kurdîstanî de îrade, ziwan, nasname û estbîyayîşê kurdan şerêko topyekûn yeno kerdene.''

Başarane bale ante tecrîdê Îmraliyî ser û vat: ''Hêrişê nikayênî dewamê komployê vera Birêz Ocalanî yê. Wextêkê dergî ra nata Ocalanî reyde pêvînayîşî nênê kerdene. Birêz Ocalan pê fikr û felefeya xo alternatîf û bingeyê cuya azade yo. Ma nêeşkenê tecrîd û sîyasetî yewbînan ra cîya biercnê. Nika xîretê şerê zereyî yê kurdan esto ke no nêzdîbîyayîş bi se serran o dewam keno.''

Başarane nêzdîbîyayîşê PDKyî yê vera kurdan û rejîmê qeyûman ercnayî û vat: ''Wextê referandumê Başûrî de dewleta tirke Başûrî rê gef wend, xîret kerd ke biba asteng. Kurdî ça de benê wa bibê dewlete tim înan hedef kena. Armanc û waştişê dewleta tirke no yo ke kurdî bê îrade bimanê. Înan qeyûmî tayînê şaredarîyanê ma kerd, sîyasetmedarê ma eştî zîndanan û nê qeyûman pêro nuşteyê kurdkî esteritî. Dewlete bi nê hawayî wazena tarîxê kurdan û ê pêro şaran bida vîrakerdene. Bi seyan embazê ma semedo ke nasnameyê xo înkar nêkerdo zîndanan de yê. Dewlete ma ra qesasê Kobanê gêna. Nika zî qefilnayîşê HDPyî vist rojdem la şarê ma Newroze cewabêko tewr weş da înan.''

Başarane îfade kerd ke înan deklarasyonê xo de pare kerd ke ê eşkenê pêro meseleyan çareser bikerê û vat: ''Meseleya kurdan meseleyêka tarîxî ya. Partîyê ke nêwazenê meseleya kurdan çareser bina ma do nînan birijnê. Semedê ameyoxê kurdan çi hewce bo ma do bikerê. Her roje Tirkîya de bi desan cinîyî kişîyenê û kiştoxî pawîyenê. Ma do na mesele çareser bikerê. Nika Tirkîya de krîzêkê ekonomî yo pîl esto. Semedê ney zî nêzdîbîyayîşê îqtîdarî yo. Çunke îqtîdar têna peyê menfatanê xo de yo û têna terefgîranê xo keno zengîn. Deklarasyonê xo de ma naye rê zî çareserîyî pêşkêş kerdî. Ma do pê rayîrê demokratîkî meseleyan çareser bikerê.''

Başarane da zanayene ke ambargoyê vera Kampa Mexmûrî sûcê merdimîye yo û vat: ''Komelê Kampa Mexmûrî heta nika zaf dejî antî. La ewro reyna pê ambargoyê PDKyî cuya înan binê tehlukeyî de ya. Ma heta peynî hetê şarê kampe de yê. Ganî meseleyê kampe cade bêrê çareserkerdene. Nika hewceyê ma bi yewîye esto. No ambargo vera merdimîye yo û ganî cade wedarîyo.''