Wekîla HDPyî ya Êlihî Ayşe Acar Başaran vizêr Meclîs de munaqeşeyanê qanûnê înfazî de qisey kerd.

Başarane hêverî sîyasetmedaranê tepişteyan rê selam kerd  û îfade kerd ke munaqeşeyê qanûnê înfazî 3 rojan ra nata dewam kenê û qanûn bi hawayêkê raştî nêno rexnekerdene.

Başarane vist vîrî ke Neteweyanê Yewbîyayeyan û Konseya Ewropa venga Tirkîya da ke tepişteyî bêrê veradayene û tedbîrî bêrê girewtene. Başarane vat: ''Venga şima ame dayene ke tepişteyî vera bidê la şima Korona sey firsend dî û terefgîrê xo vera dayî. No operasyonêko manîpule yo. Ma eşkayêne qanûnê înfazî ser o bi hawayêkê xorinêrî munaqeşe bikerê. Kesê ke cinîyî qetil kerdî cezaya xo do tam nêancê ka êyê ke tewrê çalakîye bîyî, tweetî nuştî do zîndanan de bimanê. Şima şertî kenê giranêr û têna verê azadîye nêgênê; pêro heqanê weşîyei pawitişî destê tepişteyan ra gênê. No seba Meclîsî şerm o.

Hukm nika seke çuweyê dewlete yo. Şima merdimî zîndanan de mergî reyde rî bi rî verdayî. Komel wazeno ke Selahattîn Demîrtaş, Fîgene Yuksekdag, Ahmet Altan, Gultene Kişanak bivejîyê teber. Şima xîret kerdêne ke sûcdarê îstîsmarê cînsîyî zî vera bidê la şima muxalefetê komelkîyî ra tersayî. La şima do înan tewrê pakete bikerê û parçe parçe vera bidê.''