Vervatoxa Meclîsê Cinîyan ê HDPyî Ayşe Acar Başaran kombîyayîşê çapemenîye de rojdemê cinîyan û welatî ercnayî.

Başarane verî Roja Kobanê ya Dinya selam kerde û Darbeya 4ê Teşrîna Peyêne şermezar kerde.

Qiseykerdişê Başarane ra beşêk wina yo: ''Darbeya 4ê Teşrîna Peyêne ra nata embazê ma zîndan de bi hîsê qesasî tepişîyenê. Ma bi wesîleya 4ê teşrîna peyêne sre de Gultane Kişanak, Fîgene Yuksekdag, Gulsere Yildirim, Aysele Tugluk pêro embazanê tepişteyan selam kenê. Xîretê darbe yê şima do pê kurdan, cinîyan û partîya ma nêeşkê.

Goreyê doneya teşrîna verêne de 22 cinîyî ameyî qetilkerdene, 53 cinîyî maruzê şîdetî mendî, 2 domanî kişîyayî, 49 domanî maruzê îstîsmarî mendî, 280 cinîyî ameyî tacîzkerdene. Dezgehê muhakemekerdişî ceza dano cinîyan la nêdano camêrdan. Îqtîdar zî reyna pê pakêta newîye ya muhakemekerdişî destkewteyanê cinîyan keno hedef. Polîtîkaya bêcezaverdayîşî şîdet, qirkerdiş, tacîz û tecawuzan zêdînena.

Wan de di domanî maruzê hêrişê cînsîyî mendî. Çawişo pispor Talîp K. hetê polîsan ra ame pawitene. Kurdîstan de tacîz û tecawuzî hetê îqtîdarî ra ssey çeka şerî şuxilîyenê. Dewlete û îqtîdar pê hêrişanê vera bedenanê cinîyan ê kurdan polîtîkaya qelskerdiş û ecîzkerdişî anê ca. Ma no çi dewaya Musa Orhanî de dî. Dewlete sûcanê unîformakerdeyan nimnena la Emîne Şenyaşar pê serûmî destbend kena. No dişmenîya vera kurdan û cinîyan a.

Ma Dêrsim de 'Ekolojî û Cinîye' ser o qisey kerd. Daristanê Dêrsimî semedê rant û polîtîkayanê asayîşî yenê vêşnayene. Îqtîdar Dêrsim de hem qirkerdişo ekolojîk keno hem zî hêrişê elewîtîye keno. Nika zî dewlete pê madenan kena ke xozaya Dêrsimî çin bikera.

Tirkîya de krîzêko pîl esto la îqtîdar keno ke pîzeyê terefgîranê xo debikero û budçeya şerî bizêdîno. Semedê şarî budçe ra barêke zî nêdîyena. Ma do babeta budçe de vengê cinîyan do biresnê Meclîsî.

10ê teşrîna peyêne de ma kombîyayîşê Meclîsê Cinîyan bikerê, 25ê teşrîna peyêne de zî ma do xurtkerdişê paştdayîşê cinîyan ser o nîqaş bikerê. Ma do xeta newîye ya dewrê neweyî pîya ronê. Ma do tim cinîyan reyde bêrê pêser.

Îqtîdar meseleya elewîyan de samîmî nîyo, ma no rewî ra dî. Îqtîdar nika ra amadekarîya weçînayîşî keno coka şino Amed û elewîyan. Îqtîdar wazeno bi nê hawayî çimê şarî bixapîno.''