Vervatoxa Meclîsê Cinîyan ê HDPyî Ayşe Acar Başaran merkezê partîya xo de kombîyayîşê çapemenîye kerd û rojdem ercna.

Qiseykerdişê Başarane ra beşêk wina yo:

''Newroze û 8ê Adare de şarê ma no mesaj da ke wa tecrîd biqedo û Birêz Ocalanî fikranê xo şarî de pare bikero. Merganê zîndanan ra îqtîdar mesuldar o. Hewteyê vîyarteyî de zîndanî ra 2 cenazayî vejîyayî. Ganî îqtîdar cade polîtîkayanê vera zîndanan ra fek vera bido.

2022 de 49 cinîyî netîceya şîdetê camêrdan de ameyî qirkerdene. 3 menganê peyênan de 8 cinîyî 'şûmşînan ra ginayê war' û merdî. Rixmê hende şîdetî zî pê qanûnêkê neweyî camêrdî hînî eşkenê 'camêrdîye' ra cezaya kême bigêrê. Reyna seba ke camêrdî azad bibê qanûnî yenê kerdene. Ganî îqtîdar herinda nê qanûnan de cade 'Peymana Îstanbulî' bîyaro ca. Dezgehê hukmî hêzî dano camêrdan û camêrdan vera cinîyan şuxilneno. Ma reyna vanê ke do na cuye qebul mekerê.

Şer seba cinîyan yeno manaya tacîz, tecawuz, şîdet, xizanîye û îstîsmar. Bedenê cinîyan sey welatan pê polîtîkayanê tecawuzî yenê îşxalkerdene. Ma venga pêro cinîyan danê ke êrê ma pîya îtîfaq û paştdayîşê cinîyan û haştîye ser o qisey bikerê. Ma 8ê Adare de bîyî yew û ser kewtî. Sey Meclîsê Cinîyan hayîya ma pê mesuldarîyanê ma est a. Seba geşkerdişê têkoşînê cinîyan û rijnayîşê nê rejîmî ma do pêro mesuldarîyan bigêrê xo milî. Ma pê bawer ê ke têkoşîno hempar ê cinîyan û îtîfaqê cinîyan do vera îtîfaqanê şer û camêrdan ser bikewê.''