Hemserekê Konseya Rayberdişî ya KCKyî mesajêko nuştekî şawit Festîvala Kulturê Kurdan a Mîyaneteweyîye.

Mesajê Bayikî ra qismêk wina yo:

''Ma sere de festîvala şima selam kenê, şima pêrune rê serkewtiş wazenê, şehîdanê ma yad kenê  û soz danê ke ma do waştişê înan biresnê serkewtişî. Rayber Apo semedê averşîyayîşê kultur û hunerê kurdan keda pîle dano, ma ey rê mînetdar ê. Rayber Apo Îmrali de têkoşîno tarîxî dano, bi na wesîle ez  têkoşînê ey selam kena, selam û hurmetê xo ci rê şawena.

Cuye bê kultur û hunerî nêbena. Coka dewlete neteweyî, hêzê modernîteya kapîtalîste, heme hêzê serdestê seba ke merdimîye rayîrê raştî sero bifînê, erjanê ci ra raqilnê polîtîkayanê taybetan ê qirkerdişî rayra benê. Modernîteya kapîtalîste kultur û hunerî sey sektorêk vînena. Bi metodanê nerman zî wazenê însanan, komelan bîgêrê binê kontrolê xo. Vera nê polîtîkayan û hêrişan her têkoşîn û xoverdayîş erjîyaye yê, bimarek ê. Kultur ameyox û raştîya şaran o. Her komel serê qoqê xo de beno pîl, ciwîyeno, aver şino.  Senî ke vaş qoqê xora bibo beno wuşk, însan û komelî zî wina yê.

Xora her kesî ra zafêr kurdî raştê qirkerdişê kulturkî ameyî. Hêzê zalim û qirkerî hema zî seba ke komelê kurdan çîn bikerê her qeyde hêriş kenê. Bi qirkerdişê sipîyî ziwan, kultur û hunerî qetil kenê. La şarê kurdî çirey milê xo çewt nêkerd, tim serê linganê xo de vindert û semedê azadîya xo têkoşîn kerd. Bitaybetî rolê kulturê dengbêjî zaf o. Coka Rayber Apo vano şarê kurdî tarîx de bi muzîkî vera îşxalî xover da. Nika avantajê şarê kurdî zaf ê. Têkoşînê ma yê 50 serran erjê girdî afirnayî. Têkoşîno destankî yê  Rayber Apoyî, gerîlayanê Zap, Metîna, Avaşîn û Xakurkê, esîranê azadîye yê zîndanan ganî esaranê girdan bido afirnayene. No têkoşîno tarîxî ganî eseranê kulturkî sey bêro tacîdarkerdene.

Xeyrê bi des hezaran şehîdan kurdî ewro ronesans ciwîyenê û Rojhelatê Mîyanênî rê zî danê ciwîyayene. Felaketo tewr pîl semedê yew komelî oyo ke wayîrê kultur û hunero xo mevejîyo. Rayber Apo wayîrê kultur û hunerê kurdan vejîya û bi têkoşînê PKKyî yew kultur afirna. Bi nê hêz da kurdan ke semedê azadîye xo şer bikerê û semedê heme şaran bibê îlham. Hêrişê qirkerdişî têna bi têkoşînê leşkerî nînê şiktene.  Vera nê hêrişan ganî her hetî ra têkoşîn bêro kerdene. Hunermendî ziwan, qelb û mezgê komelî yê. Problemanê komelî vînenî semedê çareserkerdişî sekêşîya komelî kenê. Hunermendê kurd û kurdîstanijî serkêşê komelê newî yê. Dewleta qirkere wazena kurdan qir bikero. Wezîfeyê hunermendan vera nê têkoşînî averberdiş o.

Ma demê tewr krîtîkî yê têkoşînê 50 serran de yê. Pîya bi tehlukeyan firsatê girdî est ê. Tehluke têna dişmenanê kurdan ra nîno, kurdanê xayînan ra yeno. Vera nê têkoşînê Rayber Apo, gerîlayan û şarê ma est o. Ganî şarê Ewropa semedê Kurdîstanî heme îmkananê xo bikero seferber. Ganî hunermend, kedkarê hunerî û şarê ma yê ke Ewropa de yo pawitişê kultur û ziwanê kurdan sey wezîfeyê xo yê verênî bivînê.  Heme kurdî ganî bi ziwanê xo qisey bikerê, binusê  û domananê xo bi kulturê kurdê azadî pîl bikerê.

Rayber Apoyî vat, 'kultur beden o, ziwan beden o, cografya beden a, wayîrê bedenê xo bivejîyê.'  No talîmat û perspektîfo zaf muhîm o ke tim semedê ma pêrune rayîvartbar o. Şima welatî ra dûrî bî zî wa çirey zerrîya şima welatî ra dûrî mekewo. Wa xeyalê şima zî Kurdîstan bê. Ganî helêke cuwa ver koservatuarê hunerî bêrê akerdene. Ganî warê mîyanneteweyî de xebatê kultur û hunerî bêrê kerdene.

Têkoşîno esasî azadîya fîzîkîye ya Rayber Apoyî ya. Eke ma sey kurdan û dostanê kurdan heta ewro wezîfeyê xo biardêne ca heta nika Rayber Apo û şarê kurdî resaybî azadîya xo. Ewro semedê azadîya Rayber  Apoyî her ca de çalakîyî yenê kerdene. Nê çalakîyî do bi zêdbîyayîşî dewam bikerê. Têkoşînê azadîya fîzîkîye ya Rayber Apoyî de rolê kultur û hunerî muhîm o. Ma pê bawer ê ke hunermendî û kedkarê kultur û hunerî do serkêşîya na hemleya tarîxî bikerê."