Hemserekê Konseya Rayberdişî ya KCKyî Cemîl Bayikî beşdarê Bernameya Taybet ê Stêrk TVyî bi û rojdem ercna. 

Qiseykerdişê Cemîl Bayikî ra beşêk wina yo:

''Rayber Apo 23 serrî yo Îmrali de vera Komployê Mîyanneteweyî bi hawayêkê tarîxî xo ver dano. Rayber Apoyî pê xoverdayîşê xo komplogeran ra qesas girewt. Semedo ke felsefeya Rayber Apoyî hol nêame famkerdene ewro vera Komplo zî têkoşînêko hol nêno kerdene. Na kêmasîya ma ya. Felsefeya Rayber Apoyî her ke şina pêro dinya ra vila bena. Eke ma vera Komployî têkoşînêko raştikên bikerê, eke ma aadîya Rayberîye bikerê armanc hînî ma eşkenê ey azad bikerê.

Hemleya ma ya 'Wextê Azadîye' sere de ciwanan tesîrê pêro komelî kerd. Dişmenî semedo ke vera ney bigêrê hêrişê bêmabênî dayî destpêkerdene.La Hemleya ma tersê vera dişmenî çin kerd, çêrîya şarê ma vete werte. Wexto ke Denîze Poyraz ameye qetilkerdene ma dî ke şarê Tirkîya senî wayîrê Denîze Poyraz vejîyayî. Xoverdayoxê zîndanî zî bi xurtî tewrê hemle bîyî. Înan wezîfeyê xo ard ca. Şarê ma yê Rojawanî wayîrê Rayberîye vejîya, şarê Başûrî vera îşxalkerî têgêra, şarê Mexmûrî wayîrê hemle vejîya, şarê Şingalî tewrê hemle bi, şarê ma yê Rojhelatê Kurdîstanî zerrî ra tewrê hemle bi, şarê ma yê Ewropa her roje çalakîyî kerdî. 

Bi taybetî gerîlayan ruh da Hemleya 'Wextê Azadîye.' Dewleta tirke Garê de dest pê qirkerdişê kurdan kerd. La ê bin kewtî xora dima xarê herêmanê Metîna û Zapî kerd. Hemleya ma hema nêresaye armancê xo la derba girane daye dewleta tirke ya faşîste ro. Hemleya ma kerd ke AKP-MHP birijîyo. Ma 'Planê Çinkerdişî' pûç kerd, armancê ma yo newe qedînayîşê AKPyî yo. Serra diyîne ya hemle de armancê ma no yo. 

Partîyanê sey CHPyî vat qey eke PKK biqedo meseleya kurdan zî çareser bena coka înan paştî daye polîtîkayanê AKP-MHPyî. La înan raştîye dîye. CHPyî dî ke meseleya kurdan bena pîlêr û ma hê AKP-MHP rijnenê meseleya kurdan reyna viste rojdem. Kam wazeno meseleya kurdan çareser bikero ma do hetkarê ci bibê. 

Tirkîya de rojanê peyênan de nîqaşê 'Muxatab Rayber Apo yo yan nê' dîya destpêkerdene. No nîqaş ma rê, kurdan rê betal o. Rayber Apoyî serrî verî vatbi 'Cayê çareserîya meseleya kurdan Meclîs o, muxatab zî HDP yo.' Semedo ke AKPyî meseleya kurdan sey çeke xebitnayêne Rayber Apoyî wina vatbi. Rayber Apoyî semedo ke kes nêeşko meseleya kurdan îstîsmar bikero pare kerd ke ganî qanûnî bêrê kerdene, mesele Meclîs de bêra çareserkerdene û komîsyon bêro awankerdene.

Herêmanê Pawitişî yê Medya xo xoverdayîşêko tarîxî esto. Armancê dewleta tirke qirkerdişê pêor gerîlayan û stratejîya ci zî îşxalê pêro Kurdîstan bîye. Gerîlayan nê pêroyî eşkera kerdî. Dewleta tirke nêeşkaye netîce bigêra coka PDK vist mabênî. Pê ney zî qîm nêkerd û çeka kîmyewîye xebitnaye. Mengêke de 157 reyî vera gerîlayan çeka kîmyewîye şuxilîyaye, xeylêk embazê ma pê na çeke şehîd bîyî. La dişmen reyna nêeşka ser bikewo. AKP û hemkarê ci PDK se kenê wa bikerê no têkoşîn do ser bikewo. Nê hêrişê înan cara rijîyayîşê înan kenê nêzdîyêr. 

Dafikê ke PDKyî vera gerîlayan ronayî mojnenê ke PDK kamcîn aste de paştî dano Tirkîya. PDK dormeyê gerîlayan gêno, rayîranê gerîlayan qefilneno, dafikan nano ro. Şarê ma wazeno PDK wa netîceyanê nê dafikan eşkera bikero. La PDK goreyê vateyê şarî nê goreyê vateyê Tirkîya têgêreno. Şarê ma ganî hîna zêde vera PDK teda bikero. Dewleta tirke çeka kîmyewîye xebitnena la hem NATO hem zî Amerîka vengê xo ney rê nêkenê. Ganî şarê ma hesabê ney zî biperso.

Semedo ke Iraq de weçînayîşî bîyî nêzdî dişmen wazeno YNK qels bikero. Coka dişmen Silêmanî de bi hawayêkê aktîfî têgêreno. Suîkastê ke Silêmanî de bîyî têna vera kadroyanê PKKyî nîyê. Şexsê PKKyî de şarê kurdî yeno qirkerdene. Dewleta tirke Rojawan, Şingal û Herêmanê Pawitişî yê Medya de se kena Silêmanî de zî aye kena. Dewleta tirke xo rê zemînêk amade kena ke Başûrî îşxal bikera. Coka tirkmenan reyde xebitîyena. Wa hayîya şarê Başûrî pê ney biba û yew bibo. 

Şarê Rojawanî perwerê Rayber Apoyî yo. Şorişê Rojawanî tesîrê pêro dinya kerdo. Erdoganî vato 'Ma 450 hezwr koçberê Sûrîye ca kerdî. La hema bi mîlyonan estê. Ma eşkenê nê kesan cayanê bînan ê Sûrîye de ca bikerê.' Erdoganî bi nê vateyan eşkera kerd ke ê wazenê cayanê bînan ê Rojawanî zî îşxal bikerê. Wa şarê ma vera ney amadekarîya xo bikero. Wa wayîrê erdê xo, şorişê xo û erjanê xo vejîyo.

Binkewtişê DAÎŞî netîceya Xoverdayîşê Kobanê de dest pêkerd. Kobanê xo çax bi warê xoverdayîşî yo mîyanneteweyî. Dinya paştî daye Kobanê. Kobanê de planê Erdoganî ameyî pûçkerdene. Êyê ke nê şorişî pawenê şarê kurdî û şarê bînî yê; dewletêke ney. Wa çew ney xo vîr a nêkero. 6-8ê teşrîna verêne de kurdî binê sîwana HDPyî de kom bîyî. Dewleta tirke semedo ke wazena HDPyî ra qesasê xo bigêra Kobanê muhakeme kena. Serewedaritişê Kobanê de kurdî ameyî qetilkerdene. Leşker û polîsan fermanê ney kamî ra girewt? Bêguman AKP-MHPyî ra. Coka HDP nê wa AKP û MHP bêrê muhakemekerdene.

Seke zanîyeno Qirkerdişê Garê Anqara pê destê DAÎŞ û MÎTî hetê AKPyî ra ame kerdene. AKPyî bi nê hawayî waşt estbîyayîşê xo rê dewam bikero. Ê hema zî nêwazenê raşrîyanê nê qirkerdişî eşkera bikerê. Semedo ke weçînayîş de verê îtîfaqê kurdan û şaranê Tirkîya bêro girewtene no qirkerdiş ame kerdene. AKPyî zanayêne ke no îtîfaq do peynîya ci bîyaro. Şehîdanê Garê Kurdîstanê xoserî, Tirkîyaya demokratîke waştêne. Ganî ma xeta înan xo rê bikerê esas. Eke wina bo ma eşkenê îqtîdarê faşîstî bin bikerê.''