Belgefîlmo ke derheqê Serekê Pêroyî yê CHPyî Kemal Kiliçdarogluyî de 2020 de ame antene û ewro kewto rojdem de Kiliçdaroglu vano ''Mesleya kurdî ma eşkenê HDPyî reyde çareser bikerê, Ne Îmrali ne zî Qendîl muxatabê ma yê.'' Naye ser o muneqeşeyanê ke dest pêkerd dewam kenê. Hemserekê Pêroyî yê DBPyî Keskîn Bayindirî ke mesele ANFyî rê ercna vat Adresê çareserî  Abdullah Ocalan o.

Bayindirî vist vîrî ke nê muneqeşeyê neweyî nîyê û vat: ''Xora ma nê eşkerayîyanê CHPyî rê zî xerîb nîyê. Dewlete wazena têgêrayîşê sîyasîyî yê kurdan û şarî hem hetê muxatabîye hem zî hetê yewîye ra parçe bikero. Hetê CHPyî ra zî ge ge bi nê aqile dewlete eşkerayîyî yenê dayene. Xora çareserîya meseleya kurdî ya ke zafhetin a de hewce keno ke aktorê cîya cîya ca bîgirê. Eke yeno waştene ke mesele her hetî ra bêro çareserkerdene muxatap û adresê ci Abdullah Ocalan o. Ewro têna Abdullah Ocalan eşkeno na mesele de înîsîfîyatîf bîgiro û mesele çareser bikero.''

Bayindirî vat: Eke şima meclîs de semedê çareserîya meseleya kurdî meseleya ziwanê dayîke û meseleyanê bînan ê Kurdîstanî bîgirê dest û tewirê kolonyanîlizmî yê vera cografyaya Kurdîstanî cavêrdî û mesele biancê warê demokratîkî xora aktorê ci zî bedilyenê. HDP, rêxistinê komelê sîvîlî û dezgeh û partîyê têgêrayîşê sîyasîyî yê kurdan kewnê dewre. Tesbîtê Kiliçdarogluyî semedê çareserî nêbi. Ma de yew vatiş esto. Senî ke nalçix bido kerra ro.''

Keskîn Bayindirî wina dewam kerd: ''40 serrî yo yew mesele esta û hetê dewlete û sîyasetî ra zî yena muneqeşekerdene. Pêvînayîşanê Oslo û dewrê muzakereyanê demokratîkan zî ramojna ke werte de meseleya sey muxatabîye çîn a. Tesbîtê Kiliçdarogluyî yê meseleya kurdî esta û ganî bêro çareserkerdene muhîm o, la tewirê destgirewtişê mesele şaş o. Şarê kurdî qerqilîyeno ke meseleya kurdî vîjnayîşê verê ma de bêro qurbankerdene.''

Bayindirî bale ante ser ke qiseykerdişê Kiliçdarogluyî serrêk verî ameyo kerdene la baldaro ke nika wextê muneqeşeyanê vîjnayîşî de kewto rojdem û vat:  ''Ma nê eşkerayîyan ra zî vînenê ke CHP çareserîya meseleya kurdî de partîyanê xerîban ra yew o. Xora na babete de polîtîaya 100 serran a CHPyî tim înkar, îmha û asîmîlasyon o. Ma zî şarê ma zî zano ke CHP heta nika semedê meseleya kurdî çîyêk nêkerdo  û wina yew programê ci zî çîn o.

Muxalefetî heta nika sere de meseleya kurdî semedê meseleyanê muhîman ê Tirkîya hema gamêke nêeşta. Mesele semedê perwerdeyê ziwanê dayîke û gamêke nêeşte. Eke muxalefet raşta wazeno meseleyanê esasan çareser bikero û bibo îktîdar, ganî sere de meseleya kurdî semedê heme meseleyan xerîtaya rayîrî ya zelale eşkera bikero. Eke wina nêkero kewno yew pozîsyon ke senî ke nê vatişî semedê vîjnayîşî ameyî vatene.''

Bayindirî qiseykerdişê xo pê nê vatişan qedîna: ''Ma sey DBPyî muhîm vînenê ke meseleya kurdî meclîs de bêro muneqeşekerdene û semedê naye berpirsîyarîye rê zî amede yê. Şarê kurdî Newroza 2021î de reyna zelal Ocalan sey muxatabî nîşan da û waşt ke seba ke Abdullah Ocalan bieşko rolê kay bikero wa tecrîd bêro wadaritene. Xora meseleya kurdî de aktoranê muhîman ra yew HDP yo. La nika aderesê çareserî bewlî yo. Metodê bê Ocalanî zaf ameyî ceribnayene la heme zî binkewtî.''