Partîya Herêmanê Demokratîkan (DBP) Çewlîg de bi şîarê ''Bi komelê birêxistinî ver bi cuyeya azade'' îdareyê partîye yê bajarî bewlî kerd.

Hemserekê Pêroyî yê DBPyî Keskîn Bayindiro ke heyeta konferansî yê rêxistina bajarî de qisey kerd verî kesanê ke qezayanê Dîlok û Mêrdînî de dinyaya xo bedilnayî  ê yad kerdî.

Bayindirî vat: ''Dewlete wazenA destkewteyanê kurdan çîn bikero û hêzê ci yê birêxistinî tesfîye bikero. Hukmat keno ke estbîyayîşê xo serê çînkerdişê kurdan ra bidomno. Seba ke ma dewaya xo de heqdar ê şertanê tewr zehmendan de zî ma têkoşînê xo domnenê. Îqtîdaro ke pê şer û şîdetî wazenê payra bimano her çîyê welatî semed şerî xerc keno. Her roje zîndanan ra cenazeyî vejîyenê. Îqtîdar het hetî ra şarî rê zext keno. Nê şarî senî ke vera derbeya Kenan Evrenî çok nêda do vera nê hê zexdan û qirkerdişan zî çok medo. Teberê ma de rayîrê çareserî çîn o. Ne îqtîdar ne zî muhalefet wina yew game erzeno. Îqtîdar ya zî muhalefet kam beno wa bibo kam ke meseleya kurdan çareser mekero bin kewno."

Bayindirî wina dewam kerd: "Heta ewro heme îqtîdaranê ke semedê çarserkerdişê meseleya kudan çîyêk nêkerd binkewtî. Îqtîdarê AKPyî zî do sey înan bihelîyo. Seba ke mesela dahîna xorî mebo Birêz Abdullah Ocalanî muhatab bîgêrê. Na mesela pê Birêz Ocalanî çareser bena. Teberê nê de yewna rayîr çîn o. Rayîrê bînî yê şer û pêkewtişan ê. Ma sey şarê kurdî û têgêrayîşê sîyasîyî yê kurdan amadeyê ke semedê çareserkerdişê na mesele heme partîyan de pêvînayîş bikerê.  Ne muhalefet ne zî îtîfaqê cumhurî çare yo. Çare rayîrê hîrêyin o. Ma eşkenê verê rayîrê ameyoxê sîyasetê welatî bewlî bikerê. Ma ser o kayanê pîlan kay kenê la çew nêeşkeno verê ma bîgêro. Şarê kurdî gird kay kerd, gird xover da û do gird ser bikewo.''

Badê qiseykerdişî bi merasîmêk îdarekarê DBPyî yê Bajarî ameyî eşkerakerdene. Lutfu Arslan û Arîfe Bucaka bîyê hemserekê DBPyî yê Çewlîgî.