Tecrîdê ser tecrîdê serê Rayberê Şarê Kurdî Abdullah Ocalanî bi xorîbîyayîşî dewam keno. Tecrîdo ke 1999î de dest pêkerd bi metodanê ke tarîxî ra nêameyî dîyene, heta ewro ame. Avûkate Newroze Uysale derheqê babete de ANFyî qisey kerd.

Uysale rewşa zîndananê Grawa Robenî, Guantanamo Nargin, Sardunya û Malta sey nimûnê daye û ard ziwan ke çew/e eşkeno pê nînan tecrîdê Îmraliyî bîyaro ziwan. Uysale vat: ''Eşkerayo ke tarîxî ra rayberê ke têkoşînê neteweyî rayra benê raştê zextê yenê û tepişyenê. Vera nê zî rayberî xoverdayîşê pîlî danê. Nê rayberan ra yew zî birêz Ocalano ke têkoşîno tarîxî dano.

Ma 22 serrî yo vanê ke  semedê birêz Ocalanî herinda caardişê huqûqî de tewirê sîyasî esto. Coka ewro şertê ke birêz Ocalan de tede yo ganî bêro azadkerdene la çi heyf ke hetê sîyasîyî ra verê nê yeno girewtene. No proses ganî paralel bêro rayraberdene. Nimûneyanê dinya de zî tim wina bîyo. Wexto ke yew şoriş, darbe û têkoşîn yeno nuqtayêke hetê huqûqî ra bedilnayîşî yenê kerdene. Tirkîya de zî wina bi. Cezaya îdamî yê birêz Ocalanî açaryayî cezaya muebetî. Goreyê qerarê Mehkemeya Heqanê Merdiman a Ewropa badê 2014î ganî Tirkîya ceazaya muebetî de bedilnayî bikerdêne. Bi bedilnayîşêkê qanûnêkî azadîya birêz Ocalanî tim mumkun a la hêzêko sîyasîyo ke amadekarîya naye bikero çîn o.''

Uysale wina dewam kerd: 'Şertê tecrîdî û tewirê tepiştişê birêz Ocalanî sey qanûnê Ocalanî yenê namekerdene. Wexto ke birêz Ocalan ame tepiştene bi binpaykerdişê heqanê ci dest pêkerd. Heta ewro caardişê vera huqûqî yê ke yenê kerdene leteyê nê prosesê ke ma sey qanûnanê Ocalanî name kenê. Xora qanûnê ke semedê birêz Ocalanî vejîyayî ganî bi nameyê ey bêrê naskerdne. Heme binpaykerdişê heqanê ke nika zîndan de yenê kerdene verî Îmrali de bîyî.  Qanûnê Ocalanî ê yê ke senî her kesî rî bibî yeno vînayene la eslê xo de têna birêz Ocalanî rê yenê kerdene.

Badê prosesê grevanê vêşanîye ma 2019 de ma pêvînayêk kerd.  Verê naye 2016 ra nata qedexeyê 6 aşman rê ma rî bi rî bê.  7ê tebax a 2019î ra heta êlula 2020î heme muracatê ma bêcewab mendê. No Îmrali de çîyêko verêne bi. Badê elule qedexeyo newe yê avûkatan vejîya ke sebebê ci cezaya dîsîplînî ya ke par dîyayebî birêz Ocalanî aye bî. Bi eynî baheneyî keyeyê ci zî nêeşkeno ey vîno.''

Uysale vat: ''Konseya Ewropa û CPT zî tede dezgehê ke derheqê babete eşkenê qisey bikerî vera Îmraliyî bêveng ê. Ewro semedê Guantanamo xeylêk kampanyayî ameyî rayraberdene û bi qerarê mehkeme Guantanamo sey qolêka sîyaye ame namekerdene. La rixmo ke Îmrali zî sey Guantanamo yo vera ci bêveng yeno mendene. Raporê Konseya Ewropa yê zîndanan de derheqê Îmraliyî de çîyêk çîn o. No tercîhêko bizanayîş û tewirêko polîtîk o. Birêz Ocalanî nê 22 serran de  posîzyonê xo yê sîyasî pîlêr kerd û nuqtaya çareserî de rolê ard ca. Heme hetan eşkera dî ke birêz Ocalan senî xîret keno la rixmê naye zaf kesan û dezgehanê ke heqê dayenê birêz Ocalanî û zanayêne bi kerdişanê do rewşe bibo hol, zerrîya safî ra wayîrê ey û fîkranê ci nêvejîyayî xo peyde ante.  Seba ke vera kerdişanê Îmraliyî bêveng ame mendene, ewro binpaykerdişê heqan wextê OHALî heme zîndanan rê vila bîyî. Yew bêhuqûqîye miheqeq yewna bêhuqûqîye ana. Coka ganî rolê birêz Ocalanî hetê hukmê Tirkîya ra bêro qebulkerdene. Eke wina mebo hem têkoşîno huqûqî hem zî hetê fikîrkî do kêm bimano.''