Serekê Merkezê Cigêrayîşî yê Welatanê Asyaya Mîyanêne Bogdasarov Semen Arakadeviçî pare kerd ke hemkarîya bi Erdoganî zerarêko pîl da Rûsya û vat: ''Ganî na şaşîye ra fek vera bêro dayene. Eke ma kurdan rê hemkarîye nêkerê hem Sûrîye de hem zî Karabag de Erdogan do şer de ser bikewo.

Bogdasarov Semen Arakadeviçî seba çareserîya krîzê Sûrîye vat: ''Sûrîye de şer bi qedînayîşê îşxalê Tirkîya aram beno. Coka ganî QSD û Rejîmê Şarî vera Tirkîya pîya têbigêrê. Nîyetê Erdoganî çin o ke Efrîn, Ezaz, Cerblusî ra vejîyo. ''

Arakadeviçî ard ziwan ke Tirkîya têna Sûrîye de nê  Lîbya û Karabag de zî îşxalker a û vat: ''Dewleta tirke vera welatanê cîranan bi hawayêkê hêrişkerî têgêrena û wazena sînoranê xo hîra bikera. Coka Yunanîstan û Qibris de mîyanê krîzî de yo. Hetê bînî ra zî Sûrîye û Iraq îşxal kena. Tirkîya xeyalê Osmanijan kena. Dewleta tirke bi hêzanê xo tewrê şerê Karabagî kerd. Dewleta tirke wazena ke bi rayîrê dişmenîya vera Armenîstanî dewletê tirkî bêrê têhet. Dewleta tirke Sûrîye ra nêzdîyê 2000 cergî erşawitî şerê Karabagî.

Ganî Sûrîye zî Rûsya zî bi hawayêkê xurtî paştî bidê QSDyî. Kurdî herême de aktorê girîngî yê. Ganî Armenîstan venga kurdan bido û vajo 'Bêrê ma pîya vera dişmenê hemparî bibê yew.'  Îtîfaqê Putin û Erdoganî xeylêk şaş o. Ganî Moskova na şaşîye ra agêro. Bedelê hemkarîya Rûsya ya bi Erdoganî giran bi. Dostîya ke ma Sûrîye de mojnaye înan sey dişmenîye agêraye ma. Cergî bîyî xurt û cepheyan de vera ma şer kenê. Tirkîya hetê jeopolitikî ra dişmenê Rûsya ya û na raştîye qet nêvurîyena.''