Keyeyê tepişteyan 6 mengî yo Amed, Wan û Îzmîr de seba ke tepişteyê nêweşî vera bidîyê, pêvînayîşî bêrê kerdene û tepişteyî nêrê qirkerdene, nobeta edaletî kenê.

Încî Guler Altindaga ke birayê ci Abdulselam Guler 28 serrî yo zîndan de yo, mîyanê Nobeta Edaletî ya Amedî de ca gêna. Tepişte Abdulselam Guler nêweşê qelbî yo û ey ser o cezaya muebede est a.

Altindage îfade kerd ke înan verî zî seba tepişteyanê nêweşan çalakîye kerdbî û vat: ''Seba ke ma mergê tepişteyan mevînê, ma dest pê çalakîye kerd. Ma verê zîndanan, Dezgehê Tipê Edlîyî (ATK) û verê edlîye de ma çalakîye kerde. Seba ke ma mergê merdimanê xo mevînê, verê zîndanan de çalakîye kerde. Seba ke raporanê xo de raştîye bimojno ma verê ATKyî de çalakîye kerde. Her ke zaneno ke ATK tepişteyanê nêweşan rê raporê 'eşkenê zîndan de bimanê' dano. Tîya de bêedaletîyêka pîle est a.

Qanûnê zîndanan seba tepişteyanê sîyasîyan nênê caardene. Tepişteyê ke 30 serrî zîndan de manenê, nênê veradayene. Bi kontrolê edlîyî veradayîş, seba tepişteyanê sîyasîyan nêno caardene. Eke no çi bêro caardene o çax keyeyî eşkenê domananê xo tedawî bikerê.''

Altindage pare kerd ke derheqê na babete de mesuldarîyêka pîle kewena milê partîyanê sîyasîyan û vat: ''Coka ma do waştişanê xo pêşkêşê Meclîsî bikerê. Çunke bêedaletîyêka pîle est a. Ma edaletî wazenê. Ma sey merdimanê tepişteyan wazenê ke wa domanê ma biciwîyê. Wa domanê ma verê çimanê ma de nêmirê. Ganî pêro keyeyê tepişteyan û partîyê sîyasîyî paştî bidê ma.''